WILLEMSTAD – Pandemia Covid 19 no solamente a hasi un impakto ekonómiko riba entrada di nos músiko i artistanan, pero el afektá tambe salu i hasta den algun kaso fayesimentu di tur esnan ku ta metí den farándula. Anteriormente nos a duna espasio kaba na esnan ku a bai nos dilanti, pero awe nos ke manda palabranan di kondolensia na famianan di esnan ku resientemente a bai laga nos.

Ta trata aki di Alvin Roro Rodriquez kende tabata un gran Karnavalista i miembro di Hurado na Festival di Tumba durante vários aña i no mester lubidá ku e tabata entretené Públiko ku su guitara i Kansionnan. Direktiva di AMAK a tuma nota tambe di fayesementu di Johnny Maduro, ku añanan atras tabata militá den Grupo Sopito, pero sigur durante último dos dékadanan e tabata hopi ligá ku Toro Colina d.f.m. , formando parti di  su grupo musikal, pero tambe di  fungiendo diferente aña komo korista den e orkesta grandi bou di direkshon di Toro Colina.

Algun siman pasa tambe amigunan músikonan i famianan a tuma despedida di  Wendell Ricardo mihó konosí komo Didi, kende tabata pianista di e agrupashon musikal Hopi Forsa. Nos ke rekordá tambe Henky Djaoen ku tabata bahista i músiko aktivo den diferente agrupashon musikal.

Awe nos a risibí e notisia ku Kiki Statie ku tambe a militá vários aña den Farándula i a fungi komo Manager di diferente agrupashon musikal i sigur tabata tin laso estrecho ku Wilftred Boeli Boerleider, tambe a bai sosegá.

Direktiva di AMAK ta duna famianan i amigunan di esnan ku a bai sosegá, palabranan di sosten na e momentunan difísil aki i  ku durante un sakrifisio di Misa ku Direkitva di AMAK lo tene dia 22 di novèmber próksimo, nos lo rekordá tur esnan ku a bai nos dilanti.

Finalmente, ban sigui kuida i mantené reglanan di higiena ku Gobièrnu ta stipulá, pa asina ei nos por keda mantené e sifranan di kontagio abou i konsekuentemente krea posibilidatnan pa Farándula gradualmente lo por habri den un forma responsabel.

Ku tur esnan ku a bai nos dilanti, lo tin sosiegu eterno.

Direktiva di AMAK