WILLEMSTAD – Amante di arte i músika un bes mas por gosa te den nan kas di e show ‘MELOMANIAC’,  un tremendo kolaborashon entre e bailarinnan di teatro Maas, enkabesá pa Remses ‘MuisjeMuis’ Rafaela,  i e orkesta filarmóniko di Rotterdam. Djabièrnè próksimo, 21 di mei, lo ‘livestream’ e presentashon, ku ta parti di e serie di presentashon ‘RPHO MEETS MAAS’.

Na 2014, Orkesta Filarmóniko di Rotterdam a uni forsa ku Teatro Maas pa meks e mundu di músika klásiko ku baile moderno, i despues di sinku edishon eksitoso, direktora Jolanda Spoel, a bini ku un produkshon nobo. Banda di Orkesta Filarmóniko di Rotterdam i Maas Theater and Dance, Spoel a kolaborá ku Bijlmer Park Teater, unda a opta pa traha ku bailarin i músiko nobo pa asina trese algu fresku i apart. Aki bailarin profeshonal Remses Rafaela atrobe ta forma parti di e tremendo elenko.

 E presentashon lo keda transmití ‘live’ fo’i Maaspodium na Rotterd,am, i ta kuminsa 2ór i 15 di atardi, ora lokal, unda un i tur por sintonisá esaki. Pa ta parti di e ‘livestream’ por kumpra karchi na rason di 7.50 euro na www.maastd.nl/livestream-melomaniac 

Fin di e aña aki, MELOMANIAC ta spera di hasi un gira di sala di konsierto na Hulanda.

MAS DI REMSES
Anteriormente nos por a atmirá Remses Rafaela, mihó konosí komo ‘Muisje Muis’, durante su presentashon ‘RPHO MEETS MAAS’ i tambe durante e eksitoso show di Breakdance ‘B-BOY’. Na 2020, Remses a produsí su promé obra pa mucha titulá ‘Wijzer’, kual e ta preparando pa trese Korsou, Boneiru i Aruba promé ku e fin di e aña, Remses su estilo di baile ta influensia pa su raisnan krioyo, unda salsa i kalypso ta keda mesklá ku akrobasia, hip hop i baile moderno ku ta resultá den un moda di ekspreshon úniko. 

KARCHI
MELOMANIAC lo keda transmití 21 di mei, ‘live’ fo’i Maaspodium, unda e presentashon ta kuminsa 2ór i 15 di atardi, ora lokal (20:15 NL).  Karchinan ta na rason di 7,50 euro i bo por paga ku bo tarheta di krédito. Kumpra bo karchi ‘online’ na www.maastd.nl/livestream-melomaniac i risibí bo link di akseso via e-mail. 

Pa mas informashon, por siguí Remses Rafaela riba vários plataforma sosial manera Facebook.com/remses.rafaela i Instagram.com/muisjemuis of riba su wepsait www.passion-and-skillz.com.