Algun tep balioso pa uso di ATM i seguridat di tarheta

WILLEMSTAD: Banco di Caribe ta kontinuá ku e proseso pa remplasá su ATMnan ku mashinnan nobo. E ATMnan nobo tin tantu e sistema di ‘touch screen’ komo e opshon di boton pa por ehekutá un transakshon primiendo e opshon riba pantaya òf e boton ku dede.

Banco di Caribe ta kontentu di por ofresé kliente- i otro usuario un eksperensia moderno na momento ku hasi uso di e ATM nobo.  Ta pidi tur usuario pa porfabor no usa ophetonan skèrpi òf ku punta pa primi riba e pantaya òf botonnan, esaki por hasi daño na e  mashin.  Ta enfatisá pa usa bo dede òf hasi  uso di un ‘touch screen pen’ ku un punta spesial pa uso riba pantaya. Banco di Caribe ta limpia su ATMnan ku regularidat, pero ta enkurashá usuarionan pa usa hand sanitizer pa limpia man, komo un èkstra prekoushon.

Por akudí na un ATM di Banco di Caribe pa lanta sèn, pidi saldo di kuenta i si ta un kliente di Banco di Caribe, lo por transferí sèn di un kuenta pa otro i kambia PIN di bo traheta di débito Mastercard periódikamente. E rekomendashon ta semper, pa klientenan di Banco di Caribe usa e ATM di Banco di Caribe mes; esaki pa mas seguridat.

Banco di Caribe tin mas ku 30 ATM stratégikamente ubiká riba nos isla i pronto lo instalá algun ATM mas, esaki pa área di Pariba i Pabou di nos isla. Ta bon pa menshoná ku e ATMnan di Banco di Caribe na Tera Kòrá i Breedestraat Punda ta bèk den servisio.  Ta kòrda tur kliente ku por konsultá e wèpsait www.bancodicaribe.com pa un lista di tur ATM òf por hasi uso di e ‘ATM locator’ den e ‘BdC Mobile Banking’ app.  Di e manera aki por yega na e ATM di mas serka i fásilmente hasi un transferensia.