Si 85% di pueblo ta bakuná, por kuminsá habri

WILLEMSTAD —  Direktiva di AMAK ta siguiendo di aserka e desaroyonan di Covid 19 ku hopi atenshon. Esakinan sinembargo no ta muchu alentador. E situashon aki ta kousa ku músikonan i artistanan i trahadornan den horeca, pa mas ku un aña a keda privá di por a ekspresá nan mesa den un òf otro forma di arte o pa ehersé nan labor.

E situashon di Covid-19 aki ta un pandemia ku mundialmente a kousa kantidat grandi di bida humano i ku a kousa un stankamentu total di ekonomia Internashonalmente.

Durante último simannan, direktiva di AMAK ta tumando nota tambe di artistanan i personahenan yegá na Farándula ku ta keda afektá pa e Malesa di Covid i tabata tin algun kaminda kaminda por a konstatá fayesementu.

Pa e motibu aki direktiva di AMAK ta konsehá tur músiko i artista pa mas tantu posibel  bai bakuná. Si enbèrdat na momentu ku  85% di nos poblashon ta bakuná, esei por duna posibilidat pa nos aktividatnan farandulero por bolbe re-anunda den forma responsabel, ban hasié.

Direktiva di AMAK ya kaba a yega di elaborá diferente protokòl o tin diferente modelo ku ta fit ku nos ambiente kultural lokal, pa na momentu ku e situashon mehorá, nos por presentá esakinan na e outoridatnan konserní.

Finalmente Direktiva di AMAK ke deseá e diferente músikonan i artistanan ku ta interná aktualmente na CMC pa entre otro Covid 19, un pronto rekuperashon. Nos ke manda palabranan di kondolensianan na tur famianan di músiko i artistanan ku den un forma repentino a bai laga nos for di e mundu aki.

Ban mantené positivismo, hasi bon uso di nos kreatividat durante di e periodo di “lockdown” aki i ban spera ku mas pronto posibel e kontagionan por baha, pa di e forma ei Kòrsou por rebibá den un normal den un forma responsabel.

Direktiva di AMAK