Un sistema di parker efektivo den nos sentro di siudat.

Resientemente DMO i SKO a uni forsa i a kuminsá ku e proyekto ‘Willemstad Parking Benefit District’. E dos instansianan tin komo meta pa modernisá e sistema di parker den ‘Smart City Parking’ ku ta pas ku e masterplan di gobièrnu. E relashon ku gobièrnu por trese akuerdonan interesante pa por sigui mantené Punda i Otrobanda, pa implementá e proyekto gratis di WiFi ku ta kla pa kuminsá i ku nos por mustra ku nos por kuida nos sentro di siudat. Esaki ta un oportunidat di oro kaminda gobièrnu por skohe pa traha ku instansianan ku ta mas enbolbí ku Punda i Otrobanda. Despues di paga gobièrnu i ehersé tur e trabounan, e ganashi lo ser invertí den nos sentro di siudat pa asina nos por sigui ta e patrimonio rekonosí mundialmente. Pagonan di parker mester benefisiá e area i no mester bai den saku di e negoshante.

Willemstad Parking Benefit District lo tin diferente manera ku e bishitante por usa pa paga pa su lugá di parker. Esaki no ta limitá na uso di moneda so, pero tambe por usa karchinan prepago i tambe por paga pa medio di un app. E echo ku personanan mester kore pa bai paga na e mashin ta pasa pa olvido. Willemstad Parking Benefit District lo instruí tur kliente kon pa hasi uso di e diferente métodonan pa paga. Tambe nos ta ofresé luganan pa rekargá outonan eléktriko, ku lo bai bira parti di nos futuro.

Nos lo traha konhuntamente ku gobièrnu pa pasa e lei pa parti but a base di plachi di number. Asina por stòp ku e prosedura di klèm outo, esaki sigur no ta nos eskoho.

WPBD ta para pa transparensia. Na momentu ku nan ser skohé pa por manehá e sistema di parker, e pagonan pa gobièrnu lo ser hasí na tempu.

E mishon di WPBD ta pa krea un ‘customer friendly parking’ pa tur bishitante. Asina ta mehorá e bishita na nos sentro di siudat loke tambe ta benefisiá nos hendenan. E ganashi lo ser invertí den nos sentro di siudat pa asina nos por krea un mihó Willemstad. Un Willemstad ku ta aksesibel pa un i tur.

Ku e ganashi WPBD lo invertí den seguridat, WiFi gratis, bon servisio pa kliente, mantenshon i tur kos ku tin mester pa por sigui ta e patrimonio rekonosí mundialmente. E ta importante pa e ganashi ser invertí bèk den nos sentro di siudat.