WILLEMSTAD/ Ya pa algun dia kaba por skucha na diferente radio emisora e popular kansion di Ernest ‘Keke’ Willems ‘Nos Pais’ den un estilo diferente.  T’asina ku IvanO a reprodusí ‘Nos Pais’ den su estilo, pero sí manteniendo e esensia di e kansion. E kansion ta keda lansá nèt e temporada aki, ku Kòrsou ta na víspera di elekshon i ta sirbi su propósito perfektamente. Ivanhoe Willems, ku ta lansa su mes ku e nòmber artístiko IvanO ta splika ku e intenshon ta noble, i ta jùist pa inspirá tur yu di tera pa reflekshoná riba e bunitesa di Nos Pais. “Ni maske kuantu desafio, Nos Pais a demostrá di ta fuerte!”.

IvanO ta sigui splika ku e kansion, ku awor ta den un género di ritmo-kombiná/urban, ta un cover di e kompositor Ernest ”Keke” Willems, i ku e vershon original kantá pa Dennis Cecilia semper tabata un gran inspirashon, spesialmente p’e (i pa hopi mas) ku ta residensiá den eksterior. E kantante, i produktor residensia na Hulanda a bin ta tene su mes okupá produsiendo pa e.o Icons i próksimamente lo tin algun kansion komo solista tambe. Nos tur ta kòrda e resien hit di IvanO ‘Mas Mi Drai’ na unda e’la feature Qshans. IvanO tambe ta pertenesé na e kas di produkshon Decoded. Pa awòki fanátikonan por pidi ‘Nos Pais’ na tur radioemisora i sigui IvanO riba su Instagram @official__ivano , Facebook/ SnapChat @ivanhoewillems Artistanan di Decoded ta figurá tambe riba e Youtube Channel, Facebook, Instagram i SnapChat @decodedofficial. Por stream e piesanan riba Spotify, iTunes, Tidal i Apple Music tambe.