WILLEMSTAD- 14 di yanüari 2021 – Resientemente Ofisina di Turismo di Kòrsou (CTB) i  University of Curaçao Dr. Moises da Costa Gomez (UoC) a firma un Memorandum of Understanding (MoU). Firmamentu di e MoU ta resultado di reunionnan entre CTB i e universidat ku e propósito pa formalisá un struktura no eksklusivo di koperashon entre e dos partidonan. E MoU ta enserá programanan di interkambio i kolaborashon entre e partidonan den áreanan di konosementu, desaroyo sostenibel i ekspanshon di industria di turismo. CEO di CTB sr. Paul Pennicook i Rector Magnificus di UoC, dr. Francis de Lanoy a firma e MoU. Na e okashon akí sr. Pennicook a remarká: “Nos ta mira firmamentu di e MoU ku UoC komo un manera pa kontribuí na desaroyo di e kapital humano nesesario pa industria di turismo. Studiantenan di e estudio di International Hospitality & Tourism Management ta e personanan ku den futuro lo mester bai duna guia na e industria importante aki. P’esei kada invershon den nan desaroyo awor akí por ta di gran balor pa nan futuro karera”. Sr. De Lanoy na su turno a indiká ku: “Nos mester hasi uso di e periodo di COVID akí pa prepará nos hóbennan debidamente pa ekipá nan pa yuda e sektor pa lanta atrobe e industria di turismo i hospitalidat di nos isla. E enfoke internashonal di e programa lo duna nan e konosementu i abilidatnan pa no traha solamente lokalmente, pero tambe globalmente. E poder di nos isla ta den nos mes hendenan i nos diversidat. Ta p’esei mes e slogan di UoC ta: “Kreando Kapasidat Lokal pa un Futuro Global”.   

E MoU ta kubri un total di 8 área, entre nan: desaroyo di proyektonan di investigashon na interes di e industria di turismo, envolvimentu di studiantenan den ehekushon di investigashonnan, interkambio di informashon, rekursonan i publikashonnan akadémiko i eksplorashon di áreanan di interes den kuadro di desaroyo di merkadeo i produkto kaminda lo por optené sertifikadonan rekonosé/akreditá ku ta na interes di tur dos partido.

For di aña pasá ya partidonan a kuminsá duna kontenido na e MoU kaminda studiantenan a haña entre otro un ‘guest lecture’ di e CEO di CTB. Tambe CTB a duna un presentashon na kuminsamentu di e programa di estudio i e seshon di entrega di sertifikado komo parti di e periodo di stazje kòrtiku ku e studiantenan a eksperensiá na Dreams Curaçao Resort, Spa & Casino, Avila Beach Hotel, Curaçao Marriott Beach Resort i Sunscape Curaçao Resort, Spa & Casino.