Sra. Milaika Ras- Capella ta gana KIA Sportage 2014

WILLEMSTAD – Tabata durante di fin di aña ku Renaissance Mall & Rif Fort i Carnaval Casino a tene e espektakular kampaña ‘Island Extravaganza’, dia 28 di desèmber último a saka e ganadornan. E atardi a kuminsá den forma festivo ku un bazar; ‘Xtravagant New Years Fair’, tambe muchanan por a disfrutá di e Arts & Crafts Corner di Crea Bea. Durante di dia tabata tin presentashon di grupo di salsa, Salsation, Son CC, Big Band ku presentashon di Hendrick de Windt, Farley Lourens, Andrew Aalse, Clinton Hato i Riggwenda Doorje ku a sá di pone tremendo ambiente. Na klousura di e selebrashon tabata tin presentashon di D’Edge Band den Rif Fort. E ganadornan di ‘Island Extravaganza’ a resultá; Sam Van Leeuwen ku a gana $1,000 na ‘shopping spree’ na diferente establesimentu den  Renaissance Mall & Rif Fort, Melissa Haseth ku a gana un ‘trip’ pa 2 persona pa Aruba miéntras ku Franklin Axson a gana un estadia pa 2 persona na Miami. Gerrit Schakel a bai kas ku Nafl. 10,000 kèsh miéntras ku e premio grandi di e kampaña, e KIA Sportage 2014 full ekipá a bai pa Sra. Milaika Ras-Capella. Un alegria inmenso pa famia Ras-Capella ku ta ‘kore’ drenta 2014 ku nan outo nobo nobo!