Kòrsou, 20 di novèmber 2020 – Stichting Kinderbescherming Curaçao ta kontentu pa anunsiá e lansamentu di e wèpsait pa Telefòn pa Mucha i Hóben: www.918.cw.

Via di www.918.cw mucha, hóben i hóben adulto te ku 25 aña di edat tin e oportunidat pa tuma kontakto direktamente di manera gratis i anónimo via di e chat of telefòn ku un boluntario entrená di Stichting Kinderbescherming Curaçao (SKBC). Ademas tin un foro presente riba e sait kaminda kompañeronan di edat por hasi otro pregunta di manera anónimo i tambe kompartí eksperensianan.

E digitalisashon di e ‘Kinder- en Jeugdtelefoon’ por a ser realisá dor di e premio Helffer Kootkar ku e fundashon a risibí serka Oranje Fonds. E premio aki tin komo meta stimulá siudadania sosial. Kada 2 aña e premio aki ta wòrdu otorgá na persona- i organisashonnan ku ta esforsá nan mes pa yuda hendenan di menos rekurso  pa nan tambe por partisipa den komunidat apesar di motibunan di malesa, nesesidat o influesha kultural.

Ku e Telefòn pa Mucha i Hóben, nos ta ofresé mucha i hóben e oportunidat pa tin un kombersashon konfidensial tokante di temanan ku nan ta preferá di no kombersá ku e adultonan den nan propio entorno. Esaki por toka kalke tema. Mirando e importansia di teknologia moderno bou di mucha- i hóbennan, a skohe pa un sait kaminda e opshonnan di kontakto (chat, bèl i foro) ta sentral. 

Anteriormente ya tabata posibel pa muchanan ku ke hasi uso di e servisio di yudansa aki pa tuma kontakto gratis via di telefòn na e number 918. Pa baha e barera pa buska yudansa, Stichting Kinderbescherming Curaçao a amplia e opshonnan di kontakto ku e yegada di e wèpsait ku e chat i e foro.

Ademas tin un estilo di kas i un emblema nobo i fresku. E estilo di kas nobo ta subrayá e fase di renobashon aktual pa e Telefòn pa Mucha i Hóben.

Dor di e coronavirus, e digitalisashon di e Telefòn pa Mucha i Hóben ta mas nesesario ku nunka. E konsekuenshanan di e coronavirus, bou di kua e desempleo kresiente i e situashonnan domestiko ku ta empeorando, ta riparabel na Kòrsou. Presisamente den e tempunan insigur aki, e fundashon ke ta un kompañero di kombersashon, inkluso online.

Stichting Kinderbescherming Curaçao tin komo meta pa señalá i guia e problema di òf rondó di menornan den un situashon familiar peligroso i menasante trempan. E fundashon ta realisá e meta aki dor di traha preventivamente. E Telefòn pa Mucha i Hóben ta pertenesé na un di e programanan di prevenshon pa protehá mucha kontra di maltrato, negligensia, abusu i violensia.

E Telefòn pa Mucha i Hóben ta disponibel via chat i telefòn (918) di djaluna pa djabierne di 10:00 – 18:00 uur i djasabra di 12:00 – 18:00. E foro ta live 24/7.

Stichting Kinderbescherming Curaçao.