Willemstad- Shòfùrnan ku ta kore anochi riba Emancipatie Boulevard Dominico Don Martina (Nieuwe Haven), krusada Schottegatweg/Santa Rosaweg (altura di Zuikertuintje) i kaminda pa bai Banda Bou (área di Zegu pa Landhuis Papaya) pronto lo disfrutá di e iluminashon LED inteligente di kaya di futuro.  Aqualectra den e próksimo simannan lo instalá e armaturanan pa esaki, loke lo trese un eksperensha nobo pa e shòfùr trafikando riba e kamindanan aki anochi. Esaki ta forma parti di e pruebanan ku Aqualectra i Ministerio di Tráfiko, Transporte i planfikashon Urbano ( VVRP) ta hasiendo pa den un futuro serkano kubri tur karetera di Kòrsou ku e lusnan di futuro. Riba Emancipatie Boulevard Dominico Don Martina lo kambia 315, na Schottegatweg lo kambia 85 i na Kaminda pa Banda Bou  lo kambia 115 armatura i pera plùs pone ekipo inteligente pa komuniká ku un punto sentral den Aqualectra.

E trabounan riba Emancipatie Boulevard Dominico Don Martina lo tuma lugá di djarason 9 pa djabièrnè 11 di desèmber próksimo. Durante di e trabounan lo sera e via paden di ámbos lado di kaminda pa e trabounan tuma lugá. Lo hasi e trabou den fase pa redusí e molèster.  Lo hasi e trabounan tantu na Schottegatweg i krusada Santa Rosaweg i e trabounan na Weg naar Wèspunt den fin di siman di tal forma ku ta redusí e molèster pa outomobilsta i si mester desviá e tráfiko.

E instalashon di LED riba e tres kareternanan aki ta forma parti di un prueba di konsepto (Proof of Concept) pa remplasá lusnan di kaya rònt Kòrsou, bou di direkshon di e Departamentu di Obra Públiko di Ministerio di Tráfiko, Transporte i Planifikashon. Weg naar Westpunt, Nieuwe Havenweg i Schottegatweg ta forma parti di e prueba di konsepto aki. En total lo kambia 599 lus di kaya den e fase di prueba di konsepto.  Na Lagún ya a kambia 85 lus di kaya den e kuadro aki. E prueba di konsepto lo terminá ku instalashon di e tres áreanan aki miéntras ku ta e intenshon pa kuminsá otro aña ku e remplaso di lusnan di kaya rònt nos isla.

E lusnan LED no solamente lo garantisá un intensidat di lus mihó i konsistente riba kayanan na Kòrsou, pero tambe uso di koriente i mantenshon di e ret di lus lo ta muchu mas efisiente, dor ku Aqualectra ta risibí notifikashon instantáneo ora un lus no ta funshoná adekuadamente.