WILLEMSTAD – Nos tur sa ku e dinámiko bailarin i rapper Remses ‘MuisjeMuis’ Rafaela no por sinta ketu, ni durante e pandemia di COVID-19. Ku e produkshon teatral ‘Wijzer’, Remses a skibi un karta di amor na su dos yunan i na tur mucha ku mester nabega e ‘normal nobo’. Riba un manera kreativo Remses ta konta e historia di e aventuranan di dos ruman homber ku mester bai drumi pero nan no por pega soño. Nan ta disidí di usa nan fantasia después ku nan iPad kibra i resultado ta un eksploshon di kreatividat i fantasia. ‘Wijzer’Semper Remses tabatin un soño pa krea un obra teatral pa mucha ya ku e mes ta tata di dos yu di shete i tres aña. “Ta hopi importante pa nos muchanan rekonose nan mes den un obra teatral, ya ku e manera europeo pa hasi teatro ta poko distinkto”, Remses ta splika. E resultado final ta un kolabrashon ku bailarin Patrick Karijowidjojo, unda ta meskla ritmonan Afro Karibense ku Hip Hop, inyektá poko Capoeira i akrobasia aden i kombina ku wega di sombra. Huntu ku e talentoso multi instrumentalista Stanley Clementina, Remses a kompone e músika pa ‘Wijzer’, unda zonido di anochi a keda utilisá manera kriki. Tur e shownan tabata bendi, apesar di e reglanan di distansia sosial ku a poné ku 30 persona so por a presensia e produkshon. E resensianan di ‘Wijzer’, tambe ta impreshonante, unda Theaterkrant i Dance Magazine a papia yen elogio di e produkshon.
Pa esnan interesa na Hulanda, e presentashon di ‘Wijzer’ día 29 di november ya ta bendi, pero ainda tin algún karchi disponibel pa e presentashonnan día 2, 5, i 6 di desember benidero. Te desember, ‘Wijzer’ lo ‘tour’ ront Hulanda, i tin fecha mas ku a bin aserka na Teatro Maas. Por chèk e página web www.maastd.nl pas mas informashon.
Kos grandi na kaminda
Remses ta wak bek riba un 2019 eksitoso, unda por a mira Remses den e presentashon di B-Boy na Teatro Maas, komo su bailarin prinsipal. Riba tereno musikal tampoko e no a drumi, unda ela pega ‘Fangu nan’ ku rapper DANDO durante temporada di karnaval pa después debuta ‘Mi Love’ riba e wèpsait merikano urbano popular Worldstar. Poko poko pero sigur Remses ta lagando su marka den e mundu artístiko hulandes i su aporte i dedikashon ta keda rekonose. P’esei pa e próksimo sinku aña, por mira Remses den un eksposishon representando Kòrsou na ‘Wereldmuseum’, sitúa na Rotterdam. Pa 2021 por spera más bon músika di MuisjeMuis ku algún kolaborashon hopi interesante.
‘Wijzer’ na ABC
Remses ta priminti ku e lo hasi tur den su alkanse pa trese ‘Wijzer’ pa nos islanan den 2021. “Hoy en día muchanan ta hunga hopi riba nan iPad i nan no ta mira otro más fisikamente’, Remses a splika. Ora teatro Maas a puntre pa traha un obra pa ‘kleuter’ e tabata sa eksaktamente ki temanan e lo a kubri. ‘Mi kier a eksplora kon muchanan ta eksplora i laga nan sinti traha”, ela konkluí. Mi ke siña mi yunan kon importante ta pa usa nan imaginashon i hunga ku loke tin i e obra ta un homenahe na wega físiko i fantasia di mucha”. Remses ta habrí pa traha ku e partnernan korekto pa deleita nos muchanan ku músika i baile. Por tuma kontakto ku Remses Rafaela via e-mail na rafaelaremses@gmail.com pa mas informashon i por sigui’e riba Facebook.com/Remses Rafaela of /Muisjemuis i Instagram @muisjemuis.