Willemstad – Djabierne 30 di oktober tabata e gran final di Kòrsou, di e festival di pelíkula pa mucha “Unicef Kinder Rechten Film Festival”. Apesar di diferente kontratempu debí na e krísis di Koroná e festival ku a tuma luga kompletamente virtual, tabata un gran eksito. Skol básiko Immanuel a resulta e gran ganador ku nan produkshon: “A BETTER LIFE”. Nan a skohe komo tema, artikulo 9 di e Tratado di Derechonan di Mucha, “Muchanan no tin ku wordu separa di nan mayornan”. Skol básiko Immanuel lo representá Kòrsou den e gran final entre tur e islanan den Reino Hulandes.

Djaluna 2 di novèmber Skol básiko Immanuel a selebra e triunfu i alumno nan di e klas ganador a risibi un sertifikado i un VIP pas pa e gran final entre tur e islanan den Reino Hulandes, ku lo tuma lugá dia 21 di Novèmber proksimo.

Un i tur ku ta interesa di wak e ripitishon di e premiere i tur e pelikulanan ku e partisipa, por hasi esaki riba e pagina di Facebook: “Unicef Child Rights Film Festival Caribbean”.

E festival di pelíkula di derechonan di mucha organisá pa UNICEF, ta wòrdu sostené tambe dor di Ministerio di Asuntunan Interior i Relashonnan den Reino (BZK).