WILLEMSTAD – Relashoná ku e último akontesimentunan a konsekuensia di medidanan di Covid-19, direktiva di AMAK den konsulta ku miembronan di komishon na Interes di Farándula di Kòrsou, kier duna e siguiente aklarashon.

Na momentu ku Covid-19 a bira un pandemia i a afektá mundu hinter, Kòrsou tambe a kuminsá sinti e efektonan na medio mart di e aña aki. Lamentablemente un di e sektornan ku direktamente a keda afektá ta e sektor di Farándula. Direktiva di AMAK a mobilisá mes ora i hasiendo uso di su reglanan doméstiko a instituí un komishon, esta Komishon na Interes di Farándula (KIF) pa di e forma ei, AMAK aparte di su miembronan por salvaguardá interes di hinter e sektor di farándula.

Direktiva di AMAK ta sumamente satisfecho ku for di e promé momentu e tur e miembronan di komishon sin eksepshon a reuní pa wak na promé lugá den ki forma músikonan tambe por bini na remarke pa e areglo di NOW i na di dos lugá kon por krea strukturanan pa Farándula por keda operashonal. Direktiva di AMAK ta sumamente kontentu na tur e músikonan ku a duna oido pa kumpli ku e reglanan preskribí, pa asina ei nan por a bini na remarke pa e kompensashon finansiero.

Seguidamente despues di analisá situashon Farandulero tantu lokal i internashonal, e komishon a sigui traha i a yega na un protokòl dokumentá pa asina ei por a konvensé Minister Quincy Girigorie durante un reunion pa habri farándula dia 19 di yüni último. A konsekuensia di eskalashon, kaminda entre otro a habri frontera, diripiente nos pais a keda konfrontá ku transmishon di e vírus di Covid-19. Na mes momentu Gobièrnu di Kòrsou a tuma e desishon pa bolbe sera farándula.

E komishon na Interes di Farándula i Direktiva di AMAK na sèptèmber 2020, a manda karta pa Gobièrnu, pa eksihí un reunion den kua por re aktivá farándula den un forma responsabel. Minister Steven Martina na e momentu ei a reakshoná riba e karta i a  yama un reunion entre funshonario nan di MEO i miembronan di e komishon.

Komishon  na Interes i farándula a bolbe presentá un di dos protokòl i huntu ku e funkshonarionan di Gobièrnu a yega na un palabrashon adishonal ( aanvullende richlijnen) den kua ta stipulá kon sektor di farándula por kuminsá operá den un forma responsabel.

E komishon na Interes di Farándula a reuní tambe ku direktiva di Restorantnan pa huntu hasi esfuerso pa músikonan por haña trabou den e diferente empresanan di Horeca i aki tambe a yega na palabrashonnan fiho.

Komo ku e desishon final pa e di dos protokòl bini na vigor pa farándula kuminsá drei i a tarda demasiado, direktiva di AMAK huntu ku KIF a notifiká Gobièrnu konforme lei di Órden Públiko “Openbare Orde”, ku lo tin un manifestashon na Plasa Wilhelmina. Pues e manifestashon a tuma lugá konforme reglanan di lei i tabata bou di responsabilidat eksklusivo di AMAK.  Direktiva di AMAK ta gradesí tur esnan ku tabata presente i tambe na tur e medionan di publisidat ku a duna kobertura na e aktividat.

Minister Steven Martina a manifestá na direktiva di AMAK ku e kier ta presente na e manifestashon i tantu direktiva di AMAK komo KIF a bai di akuerdo ku esaki.

Na e momentunan aki Komishon KIF i AMAK  ta wardando un reunion ku Gobièrnu di Kòrsou, pa evaluá e detayenan i asina ei firma e protokòl i realisá re apertura di farándula.

Atentamente

Direktiva di AMAK