WILLEMSTAD: Banco di Caribe ta anunsiá ku su ATMnan ubiká na Herst, Arco Iris, Mahaai i na Cubaweg na altura di San Lucas Mini Market ta bèk den funshon.   E ATMnan aki a keda remplasá pa esnan mas moderno ku tin ‘touch screen’ i ku por lesa chep. E ATM na Cas Grandi tambe ta bèk den servisio. Esaki sigur ta fasilitá kliente-  i usuarionan residensiá den áreanan serka di e ATM aki. Generalmente, kliente- i otro usuarionan por akudí na un ATM di Banco di Caribe pa lanta sèn, pidi saldo di kuenta i si ta un kliente di Banco di Caribe, lo por transferí sèn di un kuenta pa otro i kambia su PIN periódikamente tambe.

Tapa bo PIN pa e no ta bisto!

Banco di Caribe ta duna su klientenan algun tep balioso na momento di usa e tarheta di débito Mastercard pa hasi kualke transakshon na un ATM òf mashin di pago. Unabes ku kuminsá un transakshon, ta sali riba pantaya pa skohe entre Mastercard Debit òf Maestro. Hasi bo eskoho i ora hinka PIN,   kòrda tapa e PIN ku man di manera ku e no ta bisto pa otro hende.

‘SMS Alert’ ta ofresébo trankilidat mental

Pa un poko mas trankilidat mental, Banco di Caribe ta rekomendá su servisio di ‘SMS Alert’ ku ta permití e kliente keda na altura di kada transakshon ku wòrdu hasí ku e tarheta di débito òf krédito. Di e manera aki e kliente por konstatá mesora si un otro persona a malusá su tarheta. E servisio aki ta kompletamente grátis i por apliká p’e, entre otro, via e wèpsait di Banco di Caribe.

Ta konsehá tur kliente pa usa e ATMnan di  Banco di Caribe mes pa mas seguridat. Últimamente ta’tin algun ATM ku tabata for di servisio; Banco di Caribe ta ofresé su diskulpa pa kualke inkumbiniensia ku esaki por a trese kuné. Pa un lista kompleto di tur ATM di Banco di Caribe i nan ubikashon por bishitá e wèpsait www.bancodicaribe.com