Manera ta e tradishon pa 28 aña kaba, e aña aki un bes mas JCI Willemstad a duna atenshon na e promé beibi ku a nase. Despues di basta tempu, e aña aki St. Elisabeth Hospital tabata tin e honor pa yuda trese e yu muhe Sh’agiatezza Skoop na mundu. El a nase awe mardugá pa 00:46 am ku e peso di 3360 gram i e midí di 50 cm. Su orguyoso mayornan ta Shandelyn Ricardo i Shannuen Skoop. Un legria inmenso a reina na departamentu Anna Paviljoen, na momentu ku dòkter Suarez asisti pa zuster M. Djaoen a yuda trese e chikitin na mundu.

Bishita
Ku sosten di algun patrosinadó, direktiva di JCI Willemstad a sorpresá mayornan i yu ku varios regalo. Un bes mas JCI Willemstad a konta ku aporte di Hermanus Jewelers, Foto Studio Kort (bale pa saka potrèt), i Highlight Enterprices (artíkulonan di uso pa yu). For di 2011 Curaçao Foods Trade a bin ta ofrese Pampers na e promé beibi i e aña aki a añadi habon pa laba paña Dreft pa un aña largu na e regalonan. Curaçao Foods Trade ta orguyoso di por ofrese un aña largu Pampers na e “Official Pampers Baby 2014”. Banda di tur e artikulonan aki, beibi Sh’agiatezza a haña un bunita plakat komo rekuerdo ku e ta e promé yu di aña, meskos ku tur su otro predesesornan, serka JCI Willemstad.

Miembronan di direktiva di JCI Willemstad a bishitá e mayornan na SEHOS pa felisitá e famia di e yuchi i a hasi entrega di tur e regalonan. Presidente di JCI Willemstad, Shaneida Alcendor, a ekspresá su legria ku yegada di e yuchi i a para ketu na e tarea ku e mayornan lo bai tin pa lanta e yuchi aki di forma ehemplar pa asina e por ta un “role model” den nos komunidat. Un danki spesial ta bai na tur spònsernan ku ya pa hopi aña ta karga ku e proyekto aki i tambe na SEHOS pa e hospitalidat.

JCI Willemstad
JCI Willemstad ku su 52 aña  di eksistensia no ta un organisashon deskonosi na Kòrsou. E ta un organisashon “non-profit” ku ta enfoká riba liderazgo i formashon di personanan entre 18 i 40 aña. E mishon di JCI ta pa kontribuí na desaroyo global di nos komunidat dunando hóbennan e oportunidat pa desaroyá nan abilidat di liderazgo i responsabilidat sosial nesesario pa asina krea kambionan positivo. Keda pendiente pa plan nan grandi ku JCI Willemstad tin pa aña 2014!