Un donashon pa yama danki i duna bèk na personal di CMC

WILLEMSTAD – Tabata djaluna mainta ku maneho di Renaissance Kòrsou a hasi entrega di ‘20 anochi den hotèl’ na Curaçao Medical Center, naturalmente a tene kuenta ku tur medida di distansia sosial. Manera ku tur hende sá, na luna di Mei ultimo Renaissance Curaçao Resort & Casino i otro resortnan partisipante afiliá na HSMAI i MMGY Global a uni pa lansa e kampaña Buy One, Give One. Esaki tabata un programa di biahe diseñá pa generá entrada inmediato pa hotèlnan afiliá, miéntras ku simultáneamente ta yama danki na tur ku ta laborá den sektor médiko i ku ta esnan promé yamá pa duna asistensia den COVID-19.

E kampaña a generá hopi atenshon pa e 40 hotèl- i otro partnernan den turismo ku a partisipá. Diferente artíkulo a keda publiká den medionan di komunikashon internashonal, e wèpsait a haña mas di 150 mion impreshon i e kampaña riba social media tambe a generá miónes di impreshon i míles di ‘click’. Por bisa ku e kampaña a duna un resultado positivo; por wòrdu konkluí ku  durante e periodo di e kampaña e kantidat di reservashonnan ku a wòrdu risibí tabata mas tantu ku e reservashonnan ku tabata wòrdu kanselá.  Mayoria di e reservashonnan a wòrdu trahá pa e último kuartal di 2020 i henter aña 2021. Buy One, Give One a motivá e konsumidó pa kuminsá plania su próksimo vakashon i ta insentiv’é pa kumpra un ‘futuro’ biahe ku opshon pa disfrutá for di ougùstùs 2020 pa desèmber 2021. A kambio, hotèlnan partisipante lo hasi donashon den forma di kamber, puntonan di e rewards program, òf gift cards na un organisashon médiko di nan eskoho.  Renaissance Curaçao Resort a skohe Curaçao Medical Center (CMC) pa e bunita inisiativa aki.

Djaluna mainta, direktor di Rekurso Humano di Renaissance Curaçao Resort & Casino, sr. Angelo Martes a hasi entrega di ‘20 anochi’ na direktor di Rekurso Humano di CMC, sra. Yunaira Zink-Phelipa.  Sra. Maritza Molina, Director of Sales & Marketing di Renaissance Curaçao Resort ta splika ku e Buy One, Give One a resultá den un esfuerso karitativo kolektivo, hasiendo un opsekio bon meresí na e personal di CMC ku ta kore hopi riesgo den e pandemia aki pa yuda nan próhimo i pa tal motibu ke a duna maske ta algun di nan e oportunidat pa disfrutá di un dia plasentero i relahante na Renaissance Curaçao Resort.