WILLEMSTAD- 27 di desèmber 2013 – Tur bishitante di nos sentro di siudat por a tuma nota ku nos brùg Emma ta dòrna na lus espesialmente pa e periodo di fin di aña. Motibu pa kua Ofisina di Turismo di Kòrsou (CTB), Curaçao Ports Authority (CPA) i Ministerio di Desaroyo Ekonomikó (MEO) a lansa un kompetensia di saka potrèt. E kompetensia a keda lansa dialuna ultimo pa Minister di Desaroyo Ekonómiko sr. Stanley Palm na momentu di lansamentu di e proyekto di WIFI grátis den nos sentro di siudat. Meta di e kompetensia ta pa por yega na un bunita imágen di nos brùg Emma ku por keda usa den kampañanan di merkadeo ku CTB ta kordiná. Na di dos lugá i CTB, CPA i MEO ke logra pa atraé nos hendenan lokal pa bishita nos sentro di siudat pa di e manera ei atmirá nos brùg Emma. Reglanan di e kompetensia ta fásil: mester ta mayor di 18 aña, kada persona por partisipá ku solamente un potrèt, e potrèt mester ilustrá brùg Emma parti anochi ora ku e lusnan ta sende, e persona ku ta partisipá den e kompetensia mester ta esun ku a saka e potrèt, e ganador ta bai di akuerdo pa CTB usa e potrèt pa kampañanan di merkadeo i e partisipante mester ta biba legalmente na Kòrsou. E potrèt mester ta di resolushon haltu. Trahadónan di CTB i CPA/KTK i MEO no por partisipá na e kompetensia aki. E kompetensia ta kore te ku dia 5 di yanüari 2014, 12:00 di mèrdia. Manda bo potrèt huntu ku bo datonan personal (nòmber, fecha di nasementu, nashonalidat, number di kontakto i email adrès) na info@curacao.com E ganador lo ser skohe pa un komishon di hurado den e di dos siman di yanüari 2014. E ganador lo risibí un montante di Naf. 2500,–., CTB, CPA i MEO ke enkurashá bo pa bishita nos sentro di siudat, saka un bunita potrèt di nos brùg Emma dòrna na lus i manda esaki aden pa asina bo tin chèns di ta e ganador di e kompetensia. Éksito!