Willemstad – Djaweps dia 20 di ougùstùs nos a haña informashon ofisial di un kaso positivo di COVID-19 di un kolega ku ta traha na nos MCB Brènch na Rio Canario. E último dia di trabou di e kolega akí tabata djaluna 17 di ougùstùs 2020.

Pa e motibu akí, gerensia di Maduro & Curiel’s Bank a tuma e desishon pa sera e brènch di Rio Canario kompleto imediatamente entrante djabièrnè 21 di ougùstùs 2020, te próksimo aviso, i inisiá e proseso di limpiesa i desinfektashon profundo (deep cleaning) na nos brènch na Rio Canario.

Den konsulta ku Dr. Gerstenbluth i su tim, a tuma e desishon pa tur kolega empleá na nos Brènch na Rio Canario bai den karantena obligatorio pa 14 dia. Nos ta lamentá ku nos ta konfrontá e situashon aki.

Tambe nos ta trahando huntu ku outoridatnan di Salubridat lokal riba e kaso spesífiko aki i e situashon general. Nos lo sigui mantené e eksigensianan di nos ofisialnan di salubridat i ta pidi henter nos komunidat pa mantené e reglanan stipulá pa nos mes i esnan rondo di nos ta seif. Den e tempu asina aki nos mester demostrá komprenshon, sigui instrukshon probá pa kuido di salú i ahustá nos akshonnan pa mantené nos mes, esnan ku nos ta stimá i esnan rondo di nos, salú i seif.

Mientrastantu, nos ta sigui suprayá pa un i tur ehersé distansiamentu sosial, i mas ku tur kos laga nos sigui sostené i apoyá otro.

Na mes momentu nos ta deseá nos kolega un pronto rekuperashon; huntu nos tin’é den orashon.