pa Creative Young Entrepreneur Award 2020

Banco di Caribe ta sostené JCI IOBA Curaçao ku premio pa e hóben empresario

WILLEMSTAD:  Banco di Caribe un biaha mas ta sostené e proyekto Creative Young Entrepreneur Award (CYEA). Hopi empresario ainda por kòrda kon na 2009 JCI IOBA Curaçao i Banco di Caribe a introdusí un premiashon na unda ta rekonosé kreatividat di e empresario hóben pa trese kambionan inovativo den su industria. For di 2009, a mantené e premiashon aki na un nivel haltu i ta notabel ku e proyekto aki a sá di sostené e empresarionan eksitoso.

Banco di Caribe i JCI IOBA Curaçao ta uni forsa ku mas partner pa ta stimulá hóbennan empresario pa e di 8 edishon di CYEA. E aña aki ta partikular, despues di Covid-19 empresarionan mester a eksplorá otro plataforma pa garantisá kontinuidat di nan empresa, den esaki kreatividat a hunga un ròl importante i tin bes asta desisivo. E empresario hóben ku awendia ta tuma e desishon di kuminsá su propio empresa tin algun reto su dilanti.

Durante e próksimo temporada JCI IOBA Curaçao ku sosten di Banco di Caribe i otro partners lo kana un trayekto pa huntu premia e Creative Young Entrepreneur 2020 durante un seremonia ku lo tuma lugá dia 17 di òktober próksimo. E aña aki lo enfoká riba un hoben empresario ku a usa digitalisashon den un bachi kreativo i a desaroyá esaki pa pone un produkto òf servisio riba merkado.  

Abo lo ta Kòrsou su siguiente ‘Creative Young Entrepreneur 2020’?

JCI IOBA Curaçao, Banco di Caribe i partners ta invitá empresarionan entre 18 pa 40 aña di edat, residensiá na Kòrsou i ku tin un empresa di 5 òf ménos aña di eksistensia pa akudí na e apertura i seshon di informashon dia 29 di ougùstùs próksimo na Bario Hotel, Otrobanda pa risibí mas detaye i inskribí mesora. Pa mas informashon por bishitá www.cyeacuracao.com òf JCI IOBA Curaçao su página di Facebook.