E wikènt aki so sobra algun karchi ’EB’ so na 27 ainda.

Willemstad – Diasabra 5 di sèptèmber, e univesidat di ambiente, The Crazy Happy Peanuts ta bai selebrá 37 aña di baila malu pasa bon. Tabata na 1983 ora ku Renard Hurtado i algun amigu a start ku e banda di ambiente den Het Cafeetje, ku tbt keda ariba den edifisio di Pablo Frederick na Saliña. Poko poko atrabes aña Happy Peanuts a kuminsá gana mas popularidat i tokanan a kuminsá drenta rònt Kòrsou. Happy Peanuts ta e uniko banda ku por bisa ku nan a toka sigur entre 400 pa 500 kasamentu i hasimentu di aña atrabes di nan trajektoria di 37 aña den farándula di Kòrsou. 

Di 5 di sèptèmber den La Hacienda Olivia na Skèrpènè, bailadonan tei gosa un poko i rekordá e dushi tempu di añanan 80 ku The Happy Peanuts, DJ Guido Tecla i Boogieman. Ya e karchinan pa ‘Early Birds’ sali na Mensings Caminda i te ku djasabra awor 15 di ougùstùs, por kumpra algun karchi ainda na e preis spesial di 27 florin. Otro siman, karchinan ta bira 37.

Pa e selebrashon ofisial dia 5 di sèptèmber, The Crazy Happy Peanuts a kuminsá prepará un tremendo repertorio, ku varios di e hitnan popular i nan kantantenan estelar. Hendrik de Windt lo bai tei, Merietza Haakmat, Gilon Westmaas, Anette Juliette i Maikel Samson tambe lo presentá durante e anochi ku Happy Peanuts. Pues prepará pa e selebrashon grandi i tur afó, den La Hacienda Olivia na airu liber i ku e ambiente di añanan 80 garantisá pa baha poko strès, baila malu i pasa bon.