Un tarheta di débito nobo ku mas benefisio pa e kliente

WILLEMSTAD: Sr. Fons Simon, CEO i General Manager di Banco di Caribe na lansamentu di e tarheta di débito nobo ta suprayá e vishon di Banco di Caribe, indikando ku e banko ta komprometé pa ofresé klientenan un banko di futuro i awe, esei ta keda konfirmá ku introdukshon di e tarheta di débito Mastercard. E tarheta aki no ta simplemente unu mas, sino unu ku ta konta ku sosten di e plataforma di Mastercard i di Maestro pa e kliente por hasi diferente tipo di transakshon usando e fondonan ku e  tin riba su kuenta koriente òf di spar. E tarheta di débito nobo tin e opshon pa hasi transakshon pasando e tarheta na un distansia chikitu estilo ‘Tap-and-Go’ na un mashin di pago.  Ademas, e ta konta ku un diseño modèrno, ya ku kontrali na e tarheta tradishonal e ta vèrtikal!

E tarheta di débito modèrno:

E tarheta di débito Mastercard  tin un koló oraño i un diseño vèrtikal. E ta  remplasá e tarheta  di débito aktual  di Banco di Caribe i  tin hopi mas benefisio. Pa e kliente  por disfrutá di esakinan, e mester aktivá e tarheta promé. E kliente ta haña un splikashon di e prosedimentu den e pakete di informashon ku e lo risibí huntu ku su tarheta nobo. Kon pa hasi esaki nos ta splika den un karta ku e kliente lo risibí huntu ku e tarheta di débito nobo.

E tarheta di débito Mastercard tin aseptashon mundial. Aparte ku e tarheta ta funshoná riba e plataforma di Mastercard, Banco di Caribe su tarheta di débito nobo lo sigui funshoná optimalmente riba e plataforma di Maestro. Ademas, e ta bini ku fasilidat di pago online ku ta duna e kliente e posibilidat  pa kumpra ‘online’ via ‘webshop’ usando e fondonan ku e tin riba su kuenta koriente.

Un fasilidat di pago mas ku e tarheta di débito Mastercard tin ta ‘Tap and Go’.  Na momento ku  e mashin di pago i un tarheta ta ekipá ku e teknologia di ‘near field communication’ (NFC), no mester insertá e tarheta mas den e mashin, sino djis pone (‘Tap’) na e pantaya pa hasi un transakshon. Otro karakterístikanan eksistente ku lo keda vigente ku e tarheta nobo ta e opshon pa paga ku chip, kambio di PIN na kualke ATM di Banco di Caribe i servisio di ‘SMS Alert’.

Distribushon di e tarheta di débito nobo

Klientenan ku ta usando un tarheta di débito bálido lo risibí e tarheta di débito Mastercard nobo via pòst na e adrès ku ta registrá na banko. Ta p’esei ta importante pa bo datonan ta korekto i aktual. E distribushon di e tarheta di débito nobo ta bai den fase i ta kuminsá pronto. E kliente ku resientemente a apliká pa un tarheta di débito, lo risibí un yamada di un representante di banko pa por pasa buska e tarheta nobo. Pa mas informashon por konsultá e sekshon di pregunta i kontesta rápido  riba www.bancodicaribe.com, Ademas, por yama 432 3555, un línea di telefòn spesial pa tur detaye relashoná ku Banco di Caribe su tarheta di débito nobo. Ta invitá tur kliente pa keda pendiente mas informashon ku Banco di Caribe lo duná durante di e próksimo temporada.