WILLEMSTAD – Despues di su debut na 2013 ku ‘Mi Ke Mas’, un zouk konvinsente ku a hasi hopi furor riba nos islanan, kantante Desiree Janga, miho konosi komo DAICY- J, ta bek ku ‘COMO DUELE ENAMORARSE’, un bachata romantiko ku ta trata di sana esnan kurason herida. ‘COMO DUELE ENAMORARSE’ ta e di tres single di e talentoso kantante ku ta kla pa su reintrodukshon musikal.
DAICY- J a keda introdusí na muzik na un edat hoben, unda e tabata rondoná pa ritmonan krioyo, pasombra su tata tabata lider di un banda di muzik kultural i e ensayonan tabata tuma lugá na nan kas. Asina e amor i pashon pa muzik a floresé, apesar ku DAICY- J a konsidera kantamentu komo un hòbi pa hopi tempu. DAICY- J ta bin di un famia musikal, entre otro su ruman Omar Janga, miho konosi komo Buchi, kende tambe ta un gran talento. Despues ku ela muda pa Hulanda pa kontinua su estudio, tog muzik a keda trek. Asina DAICY- J forma parti di diferente banda ku ta toka entre otro ritmo kombiná, merengue, salsa, bachata i tambe muzik krioyo. DAICY- J ta atmiti ku su kurason ta pega na zouk, un ritmo ku e por ekspresá su mes mihó den dje, i p’esei pa su reintrodukshon musikal, ela dedika su album na e ritmo caribense tan gusta.
DAICY- J ta konsidera Edsel Juliet komo un di su mentor mas influensial, ku semper a para kla konseho kritiko pero honesto. Daicy- J su meta prinsipal ku su muzik ta pa inspirá i yuda nos konekta ku nos pashon pa bida. Su siguiente paso ta pa destaka internationalmente, unda e ke kompartí positivismo na un publiko estranhero. “Mi ke kontagia e hóbennan I demostrá ku perseveransia I determinashon bo lo logra”, DAICY- J ta splika.
‘COMO DUELE ENAMORARSE’
E single ‘COMO DUELE ENAMORARSE’ a keda komposita pa e talentoso Quincy Comenencia i e produkshon i areglo tabata den man di produktor Albert Windster, huntu ku Martirez de Leon, ku tambe ta markando pouta na Hulanda ku su produkshonnan den e genro tipiko kultural, ritmo kombina i Kizomba. E video clip di ‘COMO DUELE ENAMORARSE’ ya ta disponibel riba You Tube, unda DAICY- J a kolabora ku un tim dinamiko di Twinsfilm enkabesa pa Mireille Adelina pa realisa e produkto final. Pa mas informashon bo por bishita DAICY- J su página di Facebook.com/deecjanga i Instagram @Dee- c. Korda pidi pa e single ‘COMO DUELE ENAMORARSE’ na tur radio emisora i televishon popular riba nos islanan i keda pendiente di futuro anunsio.
‘COMO DUELE ENAMORARSE’ riba YouTube: Daicy-J – Como duele enamorarse