Djabièrnè 22 di Mei Curaçao Beauty Pageant Committee (CBPC) a tene un meet and greet ku kandidatanan pa elekshon Miss Curaçao binidero. Na e seremonia aki a instalá tur kandidata i a skohe nan number ofisial. Inskripshon pa e elekshon a habri na kuminsamentu di e aña aki pa e elekshon final tuma lugá 27 Yüni. Pa motibu di e pandemia COVID-19, tur plan a kambia i henter Kòrsou a drenta den “lock-down”. Esaki tabatin un impakto riba e sertamen máksimo di beyesa lokal ku nos konosé. Sertamennan grandi henter mundu tambe a sufri di e impakto akí. Tabatin un opshon pa tene sertamen mas tardá pa fin di aña, tambe por tene sertamen virtual i por ultimo apuntá e promé finalista di e aña previo. CBPC a opta pa konsiderá tur opshon i tambe pa motibu ku ya nos damanan a inskribí pa partisipá. Den e insertidumbre a yega na un opshon pa apuntá promé finalista 2019, Chantal Wiertz pa bai representá nos isla na Miss Universo 2020. A tene un reunion via “Zoom” ku kandidatanan pa primeramente informánan di esaki i tende nan reakshon. Kandidatanan a komprondé esaki i a reakshoná positivo. Tambe a aserká Chantal pa wak si e ta dispuesto pa representá nos isla si apunté komo promé finalista 2019. Ora e dos partidonan a bai di akuerdo ku e kondishonnan stipulá a informá Kòrsou den un forma seremonial simbóliko. Awendia ta un tiki popular ku ta yama kandidata segun e sertamen ku e ta bai partisipá na dje, p’esei Chantal ta karga e titulo di Miss Universe Curaçao 2020. Kyrsha Attaf ta keda nos Miss Curaçao i lo keda ku su responsabilidat di esaki. Manteniendo semper nos bon relashon ku nos Kyrsha i Chantal, kada unu ta bai enfoká riba nan propio tareanan den futuro. CBPC meskos ku henter mundu mester a kambia su enfoke di sertamen di beyesa. Kòrsou i mundu kompletu ta konfrontá ku kambio den situashon sosial, finansiero

i ekonómiko. Nos enfoke di tantu nos Miss Curaçao i nos kandidatanan a kue un rumbo muchu mas sosial dediká na ayudo direkto na nos pueblo i siudadanonan afektá pa COVID-19. Nos kandidatanan ta bai drenta un proyekto di ayudo sosial ku yama “Kompartí ku bo amiga”. Kaminda ta bai duna ayudo direktamente na hende afektá. Banda di esei nos a anunsiá ku nos Miss Kòrsou lo haña un outo nobo nobo di nos main sponsor “AutoCity”. Pero banda di esei nos a haña un di dos outo na nos disposishon di parti di “AutoCity” pa nos rifa i tambe ku parti di e entrada tin ku bai bek den komunidat i tambe yuda den e situashon ku Kòrsou i mundu lástmamente ta pasando aden. Tantu nos di CBPC, nos patrosinador i nos kandidatanan ta konvensí ku nos tin ku duna bèk na Kòrsou i nos kandidatanan tin e responsabilidat di bira embahadora sosial. Nos ta keda enfoká riba kandidatanan pa nan bira “Good will Ambassadors”. Pa motibu di distansah sosial i situashon di ban lanta nos pais bèk pa pone riba pia, nos instalashon di kandidata a bai na un forma, bunita, pero poko mas sereno. Nos kandidatanan a skohe e siguiente numerashon. 1. Giurviènka Seraus, 2. Alexandra Atalita, 3. Shakira Bito, 4. Shariëngela Cijntje, 5. Christel Willems, 6. Cristine Rietwijk, 7. Alvinette Soliana, 8. Tiffany de Freitas Bras. Pa motibu ku frontera ta será ahinda, Alexandra no por ta presente ahinda, pero manera esaki ta posibel, e lo djòin su “Soul Sistersnan”, manera nan mes ta yamando otro. CBPC ta súmamente satisfecho ku e trabou ku Itel Martis a hasi pa hinka un show nèchi den otro ku pueblo di Kòrsou por a mira na televishon. CBPC ta den ekstenso deliberashon ku CTB i gobièrnu, pa pronto por duna fecha ofisial di nos elekshon pa nos saka nos Miss Curaçao ku lo representá nos isla na Miss Universo 2021. CBPC ta yama Kòrsou danki pa e aseptashon di nos kandidatan. Nos ta risibí reakshonan masha positivo di nan kualidat i nivel haltu desplegá. CBPC ta orguyoso di nan i lo sigui preparánan pa nan sigui krese pa bira dia pa dia aun mas mihó. Nos ta invitá Kòrsou pa keda pendiente pa nos siguiente aktividatnan ku ta posibel denter di e situashon aktual di nos pais.