Ofisina di Turismo di Kòrsou (CTB) ta invitá pueblo di Kòrsou…..

WILLEMSTAD- 23 di desèmber 2013 – Den kuadro di selebrashon di Pasku dia 25 di desèmber 2013, Ofisina di Turismo di Kòrsou (CTB) a prepará un programa karga ku músika i arte. Tur aktividat lo ta konsentrá den Punda i Otrobanda. Meta di e aktividat aki ta pa stimulá por medio di músika i arte interakshon entre e turistanan ku lo ta di bishita riba nos isla i nos hendenan lokal. Ta hopi ta e turistanan ku ta skohe pa pasa e temporada di fin di aña aki na Kòrsou. Ademas riba dia di Pasku lo bai tin 4 barku den nos haf ku un kapasidat di 8764 pasahero. Esaki sigur ta motibu pa nos selebrá. Manera ya ta un kustumber riba sierto dianan di aña CTB ta sòru pa músika den nos sentro di siudat espesialmente pa nos bishitantenan krusero i tambe pa esnan ku tei pa un temporada mas largu. E aña aki riba dia di Pasku e aktividatnan lo bai ta konsentrá tantu parti Punda komo Otrobanda. E programa lo ta di 10 or di mainta pa 3 or di atardi. Aparte di músika lo bai tin tambe un Plasa di Arte i obra di man riba parke Wilhelmina bou di guia di sr. Papy Adriana di Adriana’s Academy for Arts & Sciences. E parti di músika lo bai ta na enkargo di Grupo Trinchera. Riba Plasa Brion lo bai tin un grupo di aguinaldo pa deleitá tur presente ku kantikanan di Pasku. Riba Plasa Gobernador lo bai tin un kuarteto i riba Plasa Efraim Jonckheer tur presente por disfrutá di músika di ka’i òrgel. For di oranan di mainta lo bai tin un entertainment band riba Gomez Plein i despues di mèrdia un grupo di folklor. Na Handelskade i na Plasa Sha Capriles lo tin un trio. Tambe lo bai tin músika di típiko na De Ruyterkade i Colombusstraat. Pues nos kayanan prinsipal i plasanan tantu parti Punda komo Otrobanda lo ta yena ku aktividat kultural. CTB kier invitá pueblo di Kòrsou kompletu pa sali misa i bin disfrutá huntu ku e turistanan ku lo ta di bishita riba nos isla di e músika i arte ku lo keda presentá spesialmente den kuadro di selebrashon di dia di Pasku. Nos ta warda bo!