WILLEMSTAD —  Resientemente Curaçao Banda Show ku ta bou di direkshon musikal di Enrico Henriquez, a lansa un produkshon nobo riba merkado. Ta trata aki di e piesa “Tu me haces falta” komo Cover di e legendario Claudia di Colombia, pero e biaha aki den bos di Daina.

Tabata na 1972 ku e kantante Blanca Gladys Caldas Mendez, mihó konosí komo Claudia de Colombia a estrená e kansion “Tu me haces falta” ku no solamente tabata un éksito na Colombia i Venezuela, pero tambe tabata un hit aki na Kòrsou.

Despues di 48 aña, Curaçao Banda Show ta graba e kansion aki ku originalmente tabata un balada, den un vershon bolero/montuno, kantá pa Daina Sahily

Ken ta Daina

Na 1987, Daina a nanse na suidat di Coro, Venezuela i for di chikitu e tabata bou di influensia di músika di su famia, kaminda e tabata kanta na fiestanan di famia mas tantu na e estilo yanero, pero tambe otro género di músika.

Na edat hóben, e tabata partisipá na diferente festival di bos na skol i tambe universitario, kaminda e tabata Sali den e proménan.

Aunke ku e no a skohe músika komo su profeshon, e interes i e pashon pa músika tabata i ta sigui ta un direkshon prinsipal den su bida.

Na yüni 2017, huntu ku su kasá nan a disidí na bin biba na Kòrsou i algun luna despues ku e tabata na Kòrsou, el a haña oportunidat pa por a kuminsá kanta den diferente lugá di entertainement i aki nan el a sera konosí ku miembronan di Curaçao Banda Show i a reuní ku maestro Enrico.

Ku gran esfuerso i dedikashon, na 2018 el a logra forma parti di Curaçao Banda Show. Huntu ku e banda, el a sa di presentá na vários konsierto i tambe eventonan lokal. Asina na 2019 el forma parti di e Medley di Pasku II di Curaçao Banda Show.

Banda di Curaçao Banda Show, Daina ta trahando riba un proyekto di dje mes ku ta un duo musikal bou di e nòmber “Two for the Show”, kaminda nan lo enfoká riba género rock and roll, mambo, jazz i tropical mood di diferente époka.

Curaçao Banda Show

Curaçao Banda Show ta un agrupashon musikal ku ta konsentrá spesialmente riba músika latino, for di Salsa, Merengue, Cumbia, Ballenato, Bachata, Bolero i hopi mas. Su presentashonnan den pasado kompañando Pakolee na Kòrsou, pero tambe na e selebrashon di Dia di Independensia di Colombia na 2019, tabata algun dje presentashonnan  di Curaçao Banda Show ku a laga bon  komentario atras.

Ku e produkshon aki, Curaçao Banda Show ta ofresé e kansion aki na pueblo di Kòrsou ku durante hopi aña a enamorá di Claudia di Colombia i sigur di e kansion “Tu me haces Falta” ku ta asina konosí riba nos Isla. Un video clip di e grabashon aki ta keda lansá un dje dianan aki.

Atentamente

Curaçao Banda Show