Coronavirus a impaktá henter mundu i nos dushi Kòrsou tambe ta den un krísis. Hopi hende a pèrdè nan trabou i no sa kon lo sigui ku esaki den futuro. Nos tur sa kiko ta nifiká di no tin trabou ni seguridat i kiko tur e konsekuensianan esaki por trese ku n’e. Den e periodo difísil aki nos mester yuda otro i ta mas uni ku otro. Luchando huntu i yudando otro, nos ta mas fuerte i lo bai dilanti, Standing Strong Together!!

Standing Strong Together ta un proyekto ku lo start djasabra awor 2mei 2020, esaki ta danki na un persona  ku finansieramente ta bon pará i ku ke keda anónimo, huntu ku e Restorant Nultwintig, pa yuda habitantenan di e bario Nieuw Nederland i Zeewijk.

Habitantenan di e bario Nieuw Nederland i Zeewijk ta pasando den momentunan difísil dor di Coronavirus, kual a bini ku hopi reto ku n’e. Un ehèmpel ta di esnan ku a hopi a pèrdè nan trabou den turismo, poniendo ku nan no tin un entrada mas. Esaki ta konta tambe pa e Restaurant Nultwintig, ku resientemente a habri i pa motibunan di medidanan tumá mester a sera su portanan un temporada.

Un persona finansieramente stabil i ku kurason pa e bario Nieuw Nederland i Zeewijk a pone sèn disponibel serka Restaurant Nultwintig, pa kumpra komestibel i asina aki kushiná pa e habitantenan. E inisiativa aki a wòrdu positivamente i kalurosamente risibí i mes ora a sinta ku algun bosero di e bario pa asina traha un plan pa e ehekutá esaki.  

Kuminsando djasabra awor 2 di mei 2020 Restaurant Nultwintig lo start ku kushinamentu i repartí esaki di un forma spesial. Lo kushina 3 bes pa siman i den e di 2 siman lo evaluá kon esaki ta baiendo pa ahustá e proyekto si ta nesesario.  Habitantenan a haña un karta, ku a wòrdu repartí na kada kas personalmente, kaminda ta splika di e proyekto, e dianan ku nan por pasa tuma nan kuminda i e orarionan.

E kumindanan lo wòrdu prepará dor di kòkinan altamente renombrá, kaminda ta pone énfasis riba un kuminda balansá ku sufisiente proteina den forma di karni i berdura. Entretantu algun agente distribuidó a uni pa duna nan aporte na e proyekto aki dunando produktonan grátis i algun na preis redusí paso nan ta kere den e proyekto i sa ku huntu nos ta fuerte i huntu nos ta lucha pa un mihó mañan.

Aparte ku e kumindanan mester ta balansa i fresku prepará, a tene kuenta tambe ku nos medio ambiente i promové e proyekto aki na un manera konsiente. Pa ku esaki a skohe pa flyer kas pa kas i kada habitante ku bin tuma nan kuminda mester bini ku nan mes wea òf tupperware pa asina aki nos medio ambiente keda protehá di ekseso di sushi. Tambe lo te kuenta ku higiena i medidanan di seguridat ora ta prepará i saka e kuminda na momentu ku e habitantenan bin buska su kuminda. Riba petishon lo hiba kuminda pa e grandinan na kas.

Kompanianan òf personanan individual ku ke duna un man na e inisiativa aki pa ku bario di Nieuw Nederland i Zeewijk ku tin komo nòmber Standing Strong Together, tin diferente  ‘sponsor-packages’, pa  e proyekto aki por wòrdu alargá òf amplia pa otro barionan alrededor di Restaurant Nultwintig.

Luchando huntu i yudando otro, nos ta mas fuerte i lo bai dilanti. Nos mester kuida loke nos tin i kada kos chikí ta yuda pa bira algu grandi.

Team Restaurant Nultwintig i boseronan di bario Nieuw Nederland en Zeewijk.

Adrès ta Penstraat 300 (Landhuis bèrdè yama Goede Hoop) Pa mas informashon por yama libremente na 4656066 òf manda mail na m_van_hamond@hotmail.com