Den kuadro di COVID-19 i e tremendo inisiativanan ku a surgi na Kòrsou, Curaçao Pride a deklará e luna di mei, e luna di Human Pride Curaçao. E inisiativa digital akí a wòrdu lantá pa animá hende mustra i kompartí nan orguyo pa un persona, ku komunidat.

Ta diferente inisiativa a surgi pa motibu di e krísis ku nos ta aden. Anto nos ta haña ku e personanan ku ta hunga un ròl aktivo den esaki mester por wòrdu menshoná. Banda di e grupo akí nos ta haña ku hende por ta positivo tokante nan mayornan, bisiñanan òf amigunan. Por pone un potrèt di e persona ku bo ta orguyoso di dje riba Facebook ku e logo di Human Pride anto pone hashtag #humanpridecuracao.  

Ku e inisiativa akí e organisashon ta spera di duna empuhe na un fluho di mensahe positivo i emoshonante den un temporada kaminda ku notisia ta dominá pa inseguridat i miedu. Lo kompartí un selekshon di e mensahenan bunita akí riba e página di Facebook di Human Pride pa asina hopi hende logra mira esakinan. E página di Human Pride ta facebook.com/worldhumanpride.

Nos ta orguyoso di tur hende na Kòrsou!

Ken ta hasi abo sinti orguyoso? Kisas bo bisiña, bo amigu, bo mama òf tata, bo ruman, un hende ku ta traha den kuido, na Voedselbank, na gobièrnu?? Bis’é!