WILLEMSTAD – Kantante, kompositor i multi-instrumentalista Stanley Clementina tei bek ku un konsepto úniko i melódiko ku e grupo di kompa, C-SHAW. Clementina a funda e grupo aki pa kombina diferente influensia Karibense musikal, unda nan ta ilustra e versalidat di nos idioma papiamentu kombina ku spaño, ingles i francés.

Clementina kaba a proba su mes musikalmente den e komunidat Karibense i awó ta kla pa konkista tarimanan internashonal ku e banda C-SHAW. Ku ‘Quarantaine’, Clementina ke trese un ambiente pa nos komunidat, apesar di e pandemia internashonal di COVID19. Según Clementina, nos no mester biba ku miedu, pero para ketu na loke realmente ta importante durante e periodo difisil aki. “Bo por keda bo kas i tog gosa”, Clementina ta insistí. “Bisti e trahe mas bunita, ku bo sapatunan di baila i huntu nos ta trese e ambiente te den bo kas”.

C-SHAW ta konsistí di Kevin Leito riba perkushon, Quincey Braafi tambe riba perkushon, Joshua Regales riba drùm, Paulo Bouwman riba guitara, Jean Felipe ‘Djuwney’ Ansjeliena i Rafaël Maijnard riba klave i finalmente Elvis ‘Tavares’ De Brito riba Bass. Clementina a indika ku nan ta trahando duru riba un álbum di C-Shaw ku ta plania pa salí na final di 2020.

Kompetensia di ‘E kas ku mas ambiente’. Clementina i C-SHAW ke enkurasha tur fanátiko pa graba nan mes bailando riba ‘Quarantaine’ i publiká esaki riba nan página sosial manera Facebook.com/StanleyAcoustic i Instagram @stanley clementina i @c-shawofficial ku e hashtag #stayhomeandparty. Aki Stanley Clementina i C-SHAW lo skohe esnan mas kreativo i eligí e kas ku mas ambiente ku por gana un konsierto virtual priva ku Stanley Clementina i C-SHAW.

Finalmente, korda pidi pa e single ‘Quarantaine’ na tur radio emisora i televishon popular riba nos islanan i bishita Clementina i C-SHAW su páginanan web www.stanleyclementina.com i www.cshawofficial.com pa keda na altura di futuro presentashon.

‘Quarantaine’ riba YouTube: https://www.youtube.com/watch?v=FtvnvB8hFCQ

‘Quarantaine’ riba Track Drip https://distribution.trackdrip.com/smartlink.cfm?MTAwMDAwMzE1Nzcw

‘Quarantaine’ riba Spotify: album:1uBmFk6PWzYnfoidxA0rWi