Willemstad – Pa motibu di tur e restrikshonnan pa evitá ku e vírus di Corona ta plama na Kòrsou for di medio mart grandinan ku ta residensiá na diferente kas di grandi no por risibí bishita di famia. Esaki ta trese kuné ku e grandinan ta kai den soledat i aislamentu. No opstante ku nan ta bon kuidá, bishita di famia ta duna nan aliento i alegria. Curaçao Lions Club i Fundashon Lus i Speransa (FLIS) a kòrda riba nos grandinan i pa Pasku di Resurekshon a laga entregá un sorpresa chikí na habitantenan di Habaai inkluso kasnan di lèn (aanleunwoning), Nos Lanterno, Alverna i Ricardustehuis.

400 hende grandi a disfrutá di un mini Paasstòl. Bruder i zùsternan a keda gratamente sorprendí ora e trùk di entrega di Van den Tweel a subi tereno di e kas pa grandi ta basha pitu. Riba potrèt por mira kon e zùster i brudernan ta prepará e trit pa keda repartí bou di e grandinan. Potrètnan ta saka dor di e kuidadónan ku pèrmit di e grandinan.