WILLEMSTAD – E artista hulandes KBTR durante su estadia na Kòrsou no solamente a laga su famoso imagen di un kabouter aparesé den espasio públiko. E ‘street artist’ a realisá tambe un pintura mural di e fundadornan di Típiko Santa Rosa. A traves di e rèpdó Fresku KBTR a drenta den kontakto ku regisor Selwyn de Wind, ku a bini ku e idea pa e obra di arte. E regisor a graba un dokumental tokante kantante i músiko Rudy Plaate. E dokumental aki ta bai estrená den e próksimo edishon di e Curaçao International Film Festival Rotterdam (CIFFR). Klaro ku e agrupashon Típiko Santa Rosa no por falta den un dokumental tokante músika.

Típiko Santa Rosa, ku a wòrdu lantá dor di Chi Domatila (meimei den e pintura mural), a pèrkurá e konservashon i desaroyo di e músika tradishonal di e islanan karibense-hulandes. E grupo kolorido a inspirá mas banda típiko pa lanta na Aruba, Boneiru i Kòrsou. Típiko Santa Rosa ta eksistí ya pa hopi dékada i a konosé diferente konstelashon. E grupo ta bou di direkshon di Freddy Domatilia, e yu di Chi Domatilia. Nan delaster presentashon tabata aña pasá na ‘Festival di Pueblo’ den Otrobanda. 

E pintura mural históriko di e ‘street artist’ KBTR ademas di ta algu alegre, ta alabes un homenahe na un banda ku a impresioná nos komunidat. O sea, nos isla a wòrdu enrikesé ku un pida herensia kultural nobo ku henter Kòrsou por bishitá na Lanthùis Granbeeuw.

Pa mas informashon subi e página di Instagram DEKBTR i e website colourcastle.nl.