Dia 21 mart na La Tentashon

Obra teatral di Richailine Elisa

Willemstad, Dia 21 di mart próksimo lo tin e obra skibi i dirigí pa Richailine Elisa “Wachten op mijn Papa”. E lo tuma lugá 8or di anochi na La Tentashon.

E presentashon ta un ko-produkshon entre Teater KadaKen I e hóben artista yu di Kòrsou Richailine Elisa ku ta biba na Hulanda.

“Wachten op mijn Papa” ta un obra teatral skibi i dirigí pa Richailine Elisa, e ta bai tokante dos mucha muhé. Bieke (Priscilla Hijnen ) i Gaby (Shulayndra Poulina) kada un ta sinta na un parke ta warda riba un persona importante. Esaki ta nan tata biológiko.

Bieke tin 15 aña sin mira i tende di su tata. Porfin su tata ke mir’é i papia kuné. 

Gabi nunka a konosé su tata, diripiente e la risibí un karta ku su tata a mand’é pe. Den e karta ta tata ta bisé ku e tin hopi gana di wak e i si nan lo por topa mañan kuartu pasa di seis di atardi.

E dos mucha muhénan aki no konosé ni no a topa otro promé pero destino i e historia ku nan tin den komun a trese nan huntu.

Debí ku kada un tin ku warda riba e persona importante,  ta start un kombersashon entre e dos mucha muhénan aki. 

E obra ‘Wachten op mijn Papa’ ta trese un problema kultural i sosial. Ku a obra aki e regisor kier trese temanan difísil pa por debatí i kibra ku e tabú. E obra lo keda presentá pa skolnan i mediante di e obra edukativo aki e hóbennan lo por  eksperensia  i enfrentá sierto situashonnan ora bo krese sin un figura paterno. Na final por tin un diskushon interaktivo ku e aktornan.

E obra ta skibi i dirigi pa Richailine Elisa nase na Kòrsou. E la krese den un famia chikí ku un mama soltera, un  ruman hòmber i su oma ku a hunga un ròl importante den su kresementu komo persona.  Fo’i chikí Richailine tabata gusta wak novela i su soño tabata pa aktua den un. Ku 17 aña e la inskribí su mes den un grupo di teater Curacao Talent & Showbizz College na La Tentashon. 

Richailine a krese komo un di e mihó aktrisnan hóben aki na Kòrsou. Na Desèmber 2007 e la gana “Premio Karabela” un di e premionan mas rekonosé aki ku ta balorá talento lokal. E la risibí premio di mihó aktris. Mes ora e la ripara ku teater I aktuashon no ta solamente un forma di ekspresá pero su pashon.

Despues di 4 aña komo aktris, produktor i regisor na Teatro Luna Blou i La Tentashon e la disidí di buska otro horizonte i laga Kòrsou. Yena ku eksperiensha i konosementu e la disidí di sigui desaroyá su talento i e la bai studia na “De Acteerschool Rotterdam” kaminda e la kaba ku éksito. Aparte di studia aktuashon e la studia pa trahadó sosial tambe. Na Hulanda Richailine a sera konosí  ku e mundu di arte Oropeo, diferente téknika di teater i estilo di aktuashon. Durante su estudio e la haña oportunidat di forma parti den produkshonnan grandi i rekonosé na Hulanda manera De Hollanders, SKVR, Rotterdams Wijktheater i Theatergroep Playback. E la traha ku regisornan grandi manera Gerardjan Rijnders, Erik Vos, Paul Knieriem en Daniel van Klaveren. Awor aki e ta un aktris eksitoso i ta tour rònt Hulanda ku diferente obra.

Debí na su sensibilidat i afinidat sosial, Richailine ta kere ku teater mester ta aksesibel pa tur edat, spesialmente nos hóbennan. E ta kere ku nos hóbennan tambe meresé di instalashon, espasio, esenario i un plataforma pa ekspresá di un manera artístiko.

Ta p’esei e ta kompromet’é su mes di duna tayer na skolnan  i organisashonnan.  Richailine ke duna su aporte na e arte i kultura aki na Kòrsou. E ta trata di hasi esaki via di tayernan di teater i konferensha artistiko kada biaha ku e ta na nos isla. E biaha aki ku su mes produkshon di teater “Wachten op mijn Papa”.

No ta un sekreto ku tin famianan kibra aki na Kòrsou. Tin hopi mucha ta krese sin un figura paterno i esaki ta un interupshon den e proseso di kresementu den un mucha.

Krese sin un figura paterno ta algu ku pa generashon tras di generashon ta forma parti di nos kultura na Kòrsou.  Estadistikanan di 2014 a konkluí ku hogarnan na Kòrsou konsistí di mama i yu ta un di e subgruponan mas grandi den e kategoria familiar. Hopi di e mamanan soltera tin difikultat. Ku e oumento di kosto di bida i e salario mínimo no ta alkansá pa yega fin di luna, esaki tin konsekuensha den e kriansa di nan yunan. Muchanan ku ta krese sin un figura paterno hopi biaha ta emoshonalmente instabil i tin e tendensia di tin problemanan di agreshon.

E regisor di “ Wachten op mijn Papa” ku a krese den un kas sin su tata biológiko ta kere ku ta importante pa bin ku e tema dilanti i trese un punto di diskushon aki na Kòrsou. 

Richailine Elisa i Teater KadaKen ta invitá henter pueblo di Kòrsou na e presentashon di “ Wachten op mijn Papa” dia 21 di mart 2020, 8or di anochi na La Tentashon. Karchi ta na balor ni ANG 20,- optenibel na Mensings Caminada of via Teater KadaKen na teatrokadaken@gmail.com òf via whats app na +5999 672 4580.

Pa mas informashon tokante di e obra por tuma kontakto ku produktor di e obra Tesseley Jansen  na tesseley.jansen@gmail.com òf via whats app na +31685412527