WILLEMSTAD- Resientemente ASKA Insurances a hasi donashon na e ekipo di beisbòl di Montaña Abou konosí komo “Montab”.

Beisbòl komo un di e deportenan ku anualmente ta pone nos isla riba mapa mundial meresé e atenshon i sigur e aporte aki di ASKA Insurances lo aportá pa e muchanan tin mas komodidat na momentu di prepará nan mes.

Montab durante di siman ta trein alrededor di 100 mucha for di 4 te ku 16 aña na vèlt di Montaña Abou na Kaya Girasol.

E hóben nan aki ta repartí den e diferente kategorianan kuminsando for di teebal te ku Senior league.

Nan ta wòrdu prepará dor di un grupo di boluntario ku ta hasi e trabou ku sumo plaser pa di e forma aki aportá na desaroyo positivo di e muchanan tantu físiko,emoshonal komo deportivo.

ASKA a regalá kada mucha tambe un tas,bòter di awa i duki ku sigur lo ta útil pa e muchanan uza durante di nan training nan.

Natural ta di aploudí e tremendo trabou ku nan ta hasi i ASKA Insurances ta kontentu di por a aportá di e forma aki na e ekipo di beisbòl Montab i ta spera ku den futuro por sigui aportá na deporte.