Unda e Saku di Papa Pasku ta?

KRALENDIJK/ DECEMBER 2013:- Despues di un eksitoso trayekto promoshonal, Digicel ta hasi e 6 finalistanan di su kampaña konosí. Seis persona lo partisipá na e búskeda di $5,000 ku tin skondí un kaminda na Boneiru den e saku di Papa Pasku. “E kampaña a resultá un gran éksito, un kantidat enorme di SMS a keda mandá, e kaha pone na Digicel Kaya Grandi  tabata yen di resibu ku a wòrdu depositá, pues nos ta masha kontentu ku e manera ku klientenan a partisipá na e kampaña aki”, esaki di akuerdo ku Irvinia Daantje, relashonista públiko pa Digicel Boneiru. Djaluna dia 23 di desèmber e 6 finalistanan lo hasi e búskeda di $5,000- nan lo mester kompletá un seri di charada di kual e kontestanan korekto lo hiba nan na e saku. E promé persona pa haña e ‘Saku di Papa Pasku’ ta gana e sinku mil dòler! Irvinia Daantje ta sigui splika, “E reakshon di parti di pueblo di Boneiru tabata inmenso, lamentablemente ta 1 ganador por tin, pues nos ta deseá tur 6 hopi éksito. Pa esnan ku no a kai den premio e kampaña aki òf den e finalistanan pa e premio grandi, nos ke sigui motivá nan pa keda partisipá na nos promoshonnan. Nos lo tin mas kampaña masha atraktivo den 2014”. Finalistanan for di partisipashon di SMS a resultá; John Frans i tambe Chayenne Tokaay. For di aktivashon di pakete One Rate, Norman Boekhoudt i Maria Narvaes a resultá den finalista i finalmente esnan ku a kai den e finalistanan dor di kumpra na Digicel, Josselien Bernabela i Andrea Silvero. Tabata djaweps mèrdia ku e finalistanan a bishitá Digicel Kaya Grandi pa pasa dor di e reglanan pa e búskeda di djaluna próksimo. Digicel ta deseá tur 6 finalista hopi éksito ku e búskeda di e ‘Saku di Papa Pasku’.