Willemstad – Entrante 1 yanüari 2020 Ayanette Statia ta ofisialmente e direktora nobo di e prestigioso organisashon International Beauty & Fashion Foundation Curaçao (IBFF) ku a wòrdu funda pa e konosido i popular sr. Aubrey Amerika, ku na e momentu aki ta biba den eksterior i ta trahando riba plannan grandi international.

Pa e motibu aki a start un proseso pa buska e direktor(a) nobo pa sigui ku e organisashon den su totalidat. E tim di IBFF ta sumamente kontentu ku e eskoho ku sr. Aubrey Amerika a hasi den persona di Ayanette Statia komo e direktora nobo pa e organisashon i ta kla pa sigui traha. Sr. Aubrey Amerika den laso estrecho ku Ayanette Statia, lo sigui hopi serka di e organisashon i lo ta presente na momentu nan importante.

Ayanette Statia no ta deskonosí den e mundu di beyesa aki na Kòrsou i tambe International. Ayanette a aseptá e reto aki netamente komo parti di su selebrashon di 22 aña den mundu di beyesa i tin hopi espektativa pa tur loke e ta bai hasi den IBFF.

IBFF ta un organisashon di trayektoria largu den e mundu di beyesa aki na Kòrsou i ta orguyoso di tin mas ku 100 korona lokal i international den diferente kategoria danki na e trabou profeshonal di sr. Aubrey Amerika. Pa 16 aña konsekutivo IBFF ta organisá e sertámen mas grandi den beyesa pa teenager, kual ta Miss Curaçao Teenager, ku a keda gana pa e beyesa TKeyah Eugenio na Yüli 2019. Tambe 2 aña pasa, IBFF a habri oportunidat pa nos beyesa nan mas chikí i a forma e sertámen Mini Beauty International Curaçao ku e aktual ganador Zarah La Cruz.

Ayanette su meta komo direktora di IBFF ta pa den su propio estilo, sigui ku e bon trabou ku a wòrdu hasi durante tur e añanan. I pa IBFF keda e plataforma pa nos mucha- i hóbennan konosé sertámen di beyesa lokal pero tambe international. Pa nan ta ehèmpel pa otro hóbennan i konosé mas tantu di Kòrsou, turismo, arte, deporte, kultura i músika i representá nos isla international dignamente. Ya tur preparashon ta tumando lugá pa habri inskripshon pa Miss Curaçao Teenager i Mini Beauty International 2020. IBFF ta pidi pa sigui media nan sosial pa tur informashon i kosnan great ku ta na kaminda.

Ayanette lo sigui na kabes tambe di su skol di pasarela i etikèt, kual tur djasabra ta duna lès na mucha nan for di 5 te ku 18 aña. Por sigui tur informashon di e skol via e página di facebook i instagram, bou di e nòmber: mesbyayanette.

IBFF ta gradisí pueblo di Kòrsou pa tur e sosten ku semper a gosa di dje i por sigurá ku den 2020 por spera muchu mas.