WILLEMSTAD —  Djaluna dia 23 di desèmber,  Wesu Quartet lo tin un presentashon den Sambil, pa ser eksakto na Otrabanda Square nèt dilanti di Cinemark.

Wesu Quartet ta un ansamble di 4 trombon ku lo bai hasi un presentashon den Sambil, tokando vários kansion, pero sigur esnan ku ta kansionnan tradishonal di temporada di Pasku.

E konsepto Wesu ta unu ku ta enkabesá pa e konosido Hector Sampson, kende a forma konstelashonnan ku ta keda dominá pa e instrumènt di trombon.

Pa esnan ku no sa, Wesu ta un tradukshon di e palabra “Bones” na Ingles. Den mundu di músika, un Trombon na Ingles tambe ta keda yama Bones i a tradusí esaki den Wesu pa Kòrsou.

E último biaha ku e Quartet di Wesu a yega di presentá tabata na Museo Marítimo den luna di ougùstùs na aña 2011 ku éksito. Despues Wesu a subi merkado komo Salsa Duro i tabata tin diferente presentashonnan rònt Kòrsou, inkluso Festival di Tumba. Esnan ku subi You Tube i search Wesu por mira kiko e banda a hasi.

WESU QUARTET

Pa loke ta trata Wesu Quartet ku lo presentá djaluna awor dia 23 di desèmber 2019 den Sambil, esaki ta ser forma pa:

Hector Sampson, Achi Concencion, Armando Petrella di Italia i El Gio Atalita. Ya e promé ensayonan a tuma lugá i tur kos ta mustra ku djaluna dia 23 lo ta un anochi tremendo.

Un invitashon ta bai na tur amante di músika di bientu, pa nan presensia e Wesu Quartet aki. Básikamente bo ta bai haña 4 instrumènt ku ta bai kanta e kansionnan aki. E invitashon ta bai pa tur hende tei presente algu promé ku 7 or di anochi na Otrabanda Square ku ta keda nèt dilanti di Cinemark den Sambil. Entrada ta grátis.