E siguiente edishon di Kaya Kaya Street Party ta na kaminda. Djasabra 21 di desèmber e kaya nan di Ser’i Otrobanda lo ta yená atrobe ku diferente banda i dj, tambe tin bendedonan di kuminda, kos dushi i tambe eksposishon di arte. E edishon aki di Kaya Kaya ta bolbe ofrese bo e oportunidat pa atmirá pinturanan di muraya.

Ken ku bo puntra, tin diferente historia pa konta tokante e fiesta di Kaya Kaya. Unu ta bou di impreshon di e arte nan na muraya. E otro ta konta kon tremendo el a haña e shownan. Algun otro ta haña ku e evento tabata muchu druk of tabata haña ku e bar lo por a kana mihó. Kiko Kaya Kaya ta para pe? Hopi hende ta kurioso pa sa e kontesta riba e pregunta aki.

Kaya Kaya ta un fiesta di kaya ku ta pone su atenshon riba e aspekto di desaroyo di Otrobanda i tambe e sentro di Korsou. E lunanan promé ku e evento tuma lugá, e bario ta wòrdu drechá en kolaborashon ku e hendenan di bario, sponsornan i tambe boluntarionan. E bario ta haña un boost grandi dor ku esaki ta kambia kompletamente. Bo ta sinti esaki tambe ora bo ta kanando den e kayanan di Ser’i Otrobanda. E hendenan ta satisfecho pa por biba den e area di Kaya Kaya.

Kaya Kaya a wordu organisa pa prome biaha den ougustus 2018 door di Clayton Lasten, Kurt Schoop i Raygen Zuiverloon. E idea tabata pa organisa un fiesta chikitu pa bario. E la konbertí den un community building tool. Al final Kaya Kaya a wòrdu batisá komo un manera struktural ku kuater pilar di enfoke: 1. Sosial, 2. Ekonomiko, 3. Fisiko i 4. Kultural. Den e trabounan preparativo e habitantenan di bario ta bini huntu i traha huntu pa drecha nan bario, e hobenan di bario ta haña diferente trabou i ta yuda e grandinan drecha nan kasnan. E cohesie sosial ta haña un boost enorme. E bista di Ser’i Otrobanda i tambe Otrobanda ta kambiando kompletu. E pregunta pa kasnan i tambe e balor di esaki ta subiendo. Tambe bo por mira ku tin hopi mas turista ta kana den e bario pa wak e pinturanan na muraya i tambe e luganan. Esakinan ta bini huntu den e aspekto kultura di Kaya Kaya. E meta ta pa Kaya Kaya bira un evenemento di destinashon pa Kòrsou. Turistanan ku ta bini Korsou spesialmente pa e evento di Kaya Kaya. Tur kos ku e organisashon di Kaya Kaya ta hasi, mester tin su influensha riba un of mas di e pilarnan.

Schoop ta añadi: ‘Mas i mas hendenan di bario i tambe boluntarionan ta bin yuda ku e preparashonan pa prome ku e evento i tambe pa e desaroyo den e bario. “Positive Peer Pressure” nos ta yama esaki: e ambishon i entusiasmo di otronan ta kontagioso.

E fiesta mes tambe a haña un akogida enorme den komunidat. Hendenan a bini na gran kantidat!. Lasten ta konta: ‘Den e prome edishon nos a spera por lo menos 500 hende. A bini 3000 hende. E di dos edishon nos tabata prepará pa risibi 5000 hende. Esaki a bira dòbel e kantidat. E di tres edishon nos a prepará riba 10.000 hende i esaki tambe a surpasá. Nos ta sumamente agradesido na e entusiasmo di e pueblo di Kòrsou.’

Por sierto esaki a trese challenges nan kune. Zuiverloon: ‘Bo no por papia mas di un fiesta chikitu ku ta wordu organisa den e kaya nan di Otrobanda.’ Bo mester tene kuenta ku diferente faktornan ku ta hunga un rol. Pensa por ehèmpel na Security, crowd management, miho maneho di bar i tokens, i tambe henter e eksperensia di e bishitantenan, e mester bira algu disfrutabel. E bishitantenan di e evento ke sa entre otro tambe unda kua banda ta toka i djnan, nan ke sa unda nan por haña kos di kome i tambe unda e kasnan di arte ta. Tur esaki mester bini huntu den komienso riba un plataforma. Ku otro palabra, e evenemento a haña e forma di un festival.

Ku otro palabra, dor di e entusiasmo grandi, Kaya Kaya mester a expande e team ku otro profeshonalnan. E team a wordu engrandese, pa e edishon binidero, 21 di dezember. Pa crowd management Kaya Kaya lo traha en kolaborashon ku Texperience di Thakai Doran i pa barmanagement ku Toast Catering di Quincy i Hyacinth Sintiago.

Pa hasi e edishon aki posibel, e organisashon ta pidi un kontribushon di ANG 10,-. E kontribushon aki a wordu tené mas abou posibel pa por kubri e gastunan adishonal. Ku esaki bo ta sostene e parti di desaroyo di e sentro di Korsou i tambe un fiesta bunita. E bendementu di karchi di antemano lo wordu reglá pa Tibbaa. Kumprando bo karchi di antemano bo ta sigurá di bo Cup di Kaya Kaya ku bo por usa durante e evento.Es desir, pasa lihe paso OP=OP. E bendementu di karchi di antemano lo kuminda dia 9 di dezèmber. Bo por hasi esaki online pero tambe na Van den Tweel Zeelandia i Janthiel, Mensings Caminda, Bruna i Bottles.

Al final Kaya Kaya tin un meta, Schoop: ‘nos meta mas importante ta e desaroyo ku ta tuma luga dor di Kaya Kaya, pa sigui engrandese esaki. Pa e habitantenan. Pa e bario. Pa e pueblo di Korsou. I tambe pa tur e bishitantenan i partispantenan di Kaya Kaya. E meta ta pa sigui mehora e eksperensia di Kaya Kaya; ya asina nos por komparti mas historia nan bunita ku otro.’

Danki na nos spònsornan ENNIA, Curacao Tourist Board, MCB, Kooyman, AVF Paints, Amstel Bright, Total Cleaning Service I nos partner nan di media Curom I Paradise FM pa hasi e desaroyo di e bario I tambe e fiesta algu duradero. Un pa un nan ta parti e vishon riba e kuater pilar nan di e organisashon di Kaya Kaya.