Willemstad – E komishon organisadó di Festival di Tumba hubenil 2020, djadumingu último a organisá un atardi ameno i plasentero pa tur partisipante di e siguiente edishon di Tumba Hubenil Kòrsou. Durante di e enkuentro familiar aki, kada partisipante ta tin e oportunidat pa skohe nan number di aparishon ofisial i tambe sa ta kua agrupashon musikal lo yuda nan karga nan komposishon dia 18 di yanüari próksimo.

E edishon di Festival di Tumba Hubenil aki lo ta e di 40 edishon i ta konta ku 12 partisipante sumamente talentoso i bon prepará pa e reto final. Ta bon pa menshoná ku komo parti di nan preparashon, ya e hóbennan aki a risibí diferente workshop di entre otro kanto i tambe ‘stage performance’. Tur esaki, ku e meta prinsipal pa alsa nan nivel artístiko.

Pa loke ta trata e evento final mes, esaki ta pinta di bira un espektákulo tur afó. Agrupashonnan musikal Hype i tambe Excellence kada unu lo kompaña 6 tumbero riba e dia aki. E tumberonan ku agrupashon musikal Hype lo kompañá ta Zouk’aino Jacobs, Latisha Constancia, Tyrese Candelaria, Brithney Augusta, Chrysander Leonora i Aaliyah Heiliger. Pa loke ta trata Agrupashon musikal Excellence, nan lo kompaña Kira Suky Mary Bakhuis, Darlisha Valks, Xiandrah Statia, Eugeneely Florentina, Shadee Jamanika i Shurisänn Batta.

E komishon organisadó, bou di guia di Fundashon JAG, su enfoke ta pa organisá un festival di hóben pa hóben, kaminda grandi i chikí por disfrutá di e kalidat i potensial di nos tumberonan. Pues for di awor nos ta ekstendé un invitashon na e pueblo di Kòrsou pa bishita e evento aki, apoyá i sostené nos 12 partisipantenan. Bishita e página di Facebook i Instagram: Tumba Hubenil Kòrsou, i asina keda na altura e desaroyonan rondó di e evento máksimo di Karnaval Hubenil.