Randal Corsen i konhuntu den dokumental
WILLEMSTAD – Djasabra dia 14 di desèmber awor e pianista Kurasoleño Randal Corsen i su kolega Polako Janusz Olejniczak ta duna un konsierto ekstraordinario na Villa Maria, ‘Traces of Chopin’, kaminda ta hasi grabashon tambe pa e dokumental ku te awor nan a yama ‘Chopin’s Ragtime’. Eiden ta trata e influensianan Polako riba músika di Kòrsou. Atraves di e dokumental pa televishon lo profilá e rikesa i diversidat di músika Kurasoleño internashonalmente.
Janusz Olejniczak (67) ta e músiko invitá durante e evento aki. Aparte ku e ta un maestro riba piano, e ta tambe pedagogo i insidentalmente aktor (manera den e pelíkula The Pianist di Roman Polanski di 2002). E ta konsiderá komo un di e ‘Chopinistanan’ kontemporáneo mas prominente. No ta pòrnada ku na 1970 el a gana e ‘Frederyk Chopin International Competition’ na Warsovia i e tabata miembro di hurado den kompetensianan di Chopin. Durante e konsierto na Kòrsou e lo interpretá algun obra di Frédéric Chopin i asina e ta perkurá pa e kontribushon Polako.
Traces of Chopin
Pa e kontribushon Kurasoleño Randal Corsen lo sòru i e lo tin akompañamentu primario di Eric Calmes (baho) i Pernell Saturnino (perkushon), i ademas di Jean Jacques Rojer (guitara), Rhazul Sebelon (kuarta), Arjen de Graaf (violin), Marlon Conradus (drùm) i Dibo Doran (kanto). For di e komposishonnan ku e konhuntu aki lo presentá lo resaltá kon e legendario kompositor Polako Frédéric Chopin a influensiá direktamente òf indirektamente músika Kurasoleño, manera den mazurka, tambe den kuadro di e simbiósis entre músika Antiano i Europeo. Ademas Corsen i su konhuntu lo presentá un interpretashon mas kontemporáneo di e músika aki, hasta ku influensianan di jazz, pa mustra ku e desaroyo no a yega na un paro. Pa esei Rando Corsen ta prepará e areglonan spesial.
E konsierto ekstraordinario aki ta tuma lugá djasabra dia 14 di desèmber pa 6 or di atardi na Villa Maria na Skalo. Na Mensings Caminada i Van den Tweel Zeelandia por optené e karchinan di entrada na rason di 55 florin pa persona. E direktor femenino Polako Agnieszka Lipiec tambe lo t’ei ku su tim pa graba e konsierto spesial ‘Traces of Chopin’ aki pa e dokumental pa televishon Polako tokante e influensia Polako riba músika di Kòrsou.