Despues di un tremendo karera bankario

WILLEMSTAD – E luna nobo aki a habri sin ku señor Kenny Canword (58) ta na timon mas di Orco Bank. Kasi 20 aña e tabata den gerensia. Despues di a konsultá su famia, el a disidí pa rasonnan di salú pa baha ku penshun adelantá. Nan lo reforsá gerensia di e banko, pero pa loke ta su susesor, na su debido tempu lo divulgá mas informashon.

Na mas ku un oklashon señor Canword a hala e fecha pa su despedida atras, pero awor si e ta definitivo. Djaweps último el a pone su personal ofisialmente na altura i djabièrnè tabata su último dia di trabou na banko. Den fondo ta hunga un ròl ku alrededor di tres aña pasá el a sufri meningítis i esei a pone ku el a bira hopi malu mes. Gradualmente el a rekuperá bon di esei, pero e no ke kontinuá manera promé. Señor Canword lo no tuma niun funshon fulltime mas, pero komo konsehero e por tuma un enkargo aki-aya i ta na servisio pa un ke otro.

Despues ku e mes a eksperensiá ku e personal na Orco Bank a bira p’e manera famia, e último dianan a resultá ku e sentimentu ei ta konta pa e kontrapartido tambe, ke men di e personal p’e. E ta un personalidat simpátiko ku tabata un fuente di inspirashon pa su hendenan. Apesar di e emoshonnan ku na sierto momentonan a bini ariba, djabièrnè atardi na un agasaho será pa personal den kurá di banko a hari hopi i ku smak loke ta kompletamente den su stail tambe.

Señor Canword a kuminsá su karera grandioso 32 aña pasá na Banco Latino kaminda el a traha 6 aña. Despues el a muda pa Maduro & Curiel’s Bank kaminda tambe e tabata den servisio durante 6 aña. Na mei 2000 Orco Bank a atkeri’é komo Commercial Manager i Assistant Managing Director, i na yüli 2004 el a bira Managing Director i CEO di Orco Bank, e tempu aya situá ainda na dr. Henry Fergusonweg. E tempu ei apénas 20 hende tabata traha na e banko; awor aki Orco Bank ta duna empleo na 80 persona, di ariba te abou. E kresementu a obligá e banko ademas pa muda pa un akomodashon mas grandi. Esei nan a haña na Landhuis Cerrito na Schottegatweg Oost ku a ingourá di forma festivo dia 10 di aprel 2010 despues di un renovashon grandi, i algun aña despues a ekspandé e edifisio tremendamente. Ademas, Orco Bank a habri un supsidiario na Boneiru i un na St. Maarten.

Señor Canword ta laga un footprint bon kla atras. Despues di kasi 20 aña e ta bai laga Orco Bank atras hopi sano i el a disidí pa skohe pa un bida ku ménos strès.