WILLEMSTAD —Riba djaluna 28 di òktober a lansa e di shete edishon di CURA DOET, e akshon boluntario di mas grandi na Kòrsou. For di 2014 ku a lansá e promé edishon ku tabata sumamente eksitoso, organisashonnan sosial (entre otro sentronan di bario, skolnan, kasnan di kuido, klupnan deportivo, krèsh, ets.) ta inskribí un proyekto i risibí sostén di un gran kantidat di boluntario! 

Otro aña, riba dia 13 i 14 di mart, Curaçao Cares huntu ku Oranje Fonds ta bai organisá CURA DOET pa e di shete aña tras di otro. E biaha aki e lema ta “Hasi bon, ta siniti bon”. 

Tur aña míles di boluntario i representante di organisashonnan sosial ta krea memorianan inolvidabel dor di simplemente ‘hasi bon!’. E aña aki, promé ku lansamentu di CURA DOET riba 28 di òktober, ya kaba algun organisashon a inskribí nan mes ku nan proyekto. Ku esaki por mira kon importante CURA DOET ta pas nos komunidat.

CURA DOET lo no ta posibel sin apoyo i konosementu di Curaçao Cares, Oranje Fonds i Reda Sosial. E tim di Curaçao Cares ku ta e forsa tras di CURA DOET a hasi, ta konsistí di ‘project managers’ i kordinadornan di regio ku ta sumamente entusiasmá i ku tin pashon pa e proyekto.

Inskripshon pa tarea i aktividat

Organisashonnan i inisiativanan sosial por inskribí nan tarea òf aktividat for di awe riba e wèpsait www.curadoet.com òf por tuma kontakto ku Curaçao Cares na curadoet@curacaocares.org. Esaki lo ta posibel te ku 16 di yanüari 2019. Si un organisashon no tin sufisiente medio finansiero, Oranje Fonds lo por otorgá un donashon te ku 1,100 florin, por ehèmpel pa regla material òf transporte. Aporte finansiero ta limitá. Ku otro palabra…wak bo no keda afó!

For di kuminsamentu di yanüari, tur persona, famia, grupo di amigu i kompania por inskribí i buska un tarea òf aktividat spesial pa bin yuda komo boluntario durante e wikènt di CURA DOET, dianan 13 i 14 di mart 2020. Kompanianan por sostené e akshon nashonal aki tambe dor di ofresé un servisio òf produkto ku deskuento pa realisá un tarea òf aktividat. Pa skolnan, CURA DOET ta un chèns ideal pa laga hóbennan tambe sera konosí ku trabou boluntario. Henter Kòrsou t’aden! Abo tambe?

Pa mas informashon por tuma kontakto ku Vicky Trinidad, na telefòn +5999 5400177 i tambe ku nos ofisina entre 9’or -1’or di djaluna pa djaweps na telefòn +5999 7881952. Si bo ke pasa serka nos personal yama òf ‘mail’ nos promé pa traha un sita. ‘Mail’ nos na curadoet@curacaocares.org.