Un tim internashonal di investigashon lo bini Boneiru di 21 di òktober pa 9 di novèmber pa hasi investigashon di e biodiversidat marino na Boneiru. Apesar ku e refnan di Boneiru ta bon di mònitòr, no a hasi bon investigashon di nan biodiversidat ainda. Komo ku Boneiru tin un rikesa grandi di habitat marino, tin un potensial haltu aki pa deskubrí espesie eksepshonal òf te hasta espesie nobo pa siensia. Finalmente, e tim ta spera di por bisa mas tokante e forma ku biodiversidat ta distribuí rònt di e isla i kon esaki ta kompará ku e otro islanan karibense.

Boneiru su refnan ta un atrakshon turístiko famoso pero nan ta bou di menasa di algun faktor di preshon lokal i regional manera efektonan di kambio di klima, animal ku ta kana rònt libremente, espesienan invasivo eksótiko, desaroyo di konstrukshon na kosta, eroshon i eutrofisashon dor di awa di kloaka. Ta importante pa alsa e fleksibilidat di e refnan di koral di manera ku nan ta den mihó kondishon pa wanta e efektonan di kambio di klima, manera laman ku temperatura mas haltu (blikiamentu di koral) i kondishon di wer ekstremo (periodo largu di sekura i mas hopi orkan fuerte). Konsiderashonnan importante pa maneho ta enserá implementá protekshon di kosta pa medio di planifikashon di zona, redukshon di eroshon pa medio di reforestashon ku palu i mata indígena, redukshon di animal ku ta kana rònt libremente i protekshon di sierto espesienan.

Na lugá di mònitòr loke ta kubri e koralnan, e tim di investigashon lo enfoká riba tópikonan mará na presensia òf ousensia di sierto espesienan partikular. Ta esensial pa haña sa kua espesie tin mester di protekshon, miéntras ku tin espesienan ku por ta dañino pa otro i esaki tambe mester ta konosí. Ta en bèrdat asina ku sierto bestia por hasi daño na nan anfitrion, espesialmente ora nan ta presente den kantidat haltu, manera e bichinan (Spyrobranchus Giganteus) ku nan tayama ‘Christmas tree worms’. Tin espesie spesífiko di kangreu, kabaron i slak ku ta dependé kompletamente di presensia di algun espesie di organismo anfitrion, manera koral ku spòns ku nan ta usa komo nan habitat pa biba aden. Den kaso ku e espesie di anfitrion disparsé, e espesienan ku ta mará na nan tambe ta kai den ekstinshon.

Komo ku e tim di investigashon tin eksperensia di investigashon na otro sitio den Karibe, por ta ku nan ta topa ku espesienan ku nunka ainda no a opservá na Boneiru, òf nan por opservá ku algun espesie ku en general ta skars den Karibe ta aparesé na kantidat abundante na Boneiru. Na e otro sitionan ku a bishitá den añanan anterior, e tim a topa ku espesienan ku siensia no tabata konosé òf nan ta establesé rèkertnan nobo pa Karibe. E último akí por ta importante di manera ku asina por detektá presensia di espesienan introdusí, ku tin e potensia di por bira invasivo.

Kada miembro di e tim ta trese kuné su mes ekspertisio pa loke ta trata animal i mata marino. Tin miembro ku ta spesialisá den grupo di organismo renombrá, manera koral, spòns i alga, miéntras ku otronan konosé espesienan ku no ta haña asina fásilmente, pasobra ta trata di animalnan ku ta keda bon skondí, chikitu òf kamuflá. Mayoria di e miembronan di e tim ta di Hulanda, pero tin otro ku ta di Italia, Hapon, Puerto Rico, Rusia i Merka. Un parti di e tim di Hulanda tin su base na e Sentro di Biodiversidat Naturalis (Leiden) i e otronan ta representante di ANEMOON Foundation, ku ta spesialisá den mònitòr espesienan marino. E tim ta traha den kolaborashon ku STINAPA i DCNA na Boneiru. E investigashon ta finansiá parsialmente ku plaka di Fondo Mundial di Naturalesa pa Biodiversidat (WWF Netherlands Biodiversity Fund).

Charla Públiko:

Pa kualke persona ku ta interesá den e ekspedishon di investigashon, tin un charla públiko di parti di e sientífikonan ku ta di bishita, riba djaweps anochi 24 di òktober na Jong Bonaire (7-9 pm).