Djadumingu 17 di novèmber 2019

E kaminata anual di Child First Foundation, ku ta enfatisá e importansia pa un yu tin un tata aktivamente inbolukrá den su bida, ta ranka sali 6or di meinta for di e parkeo di SVB na Peter Eeuwensweg riba djadumingu dia 17 di novèmber 2019.

Aña pasá Kaminata Yu i Tata tabata un gran éksito. Miembro di direktiva, Ryan de Jongh, a duna e partisipantenan e señal pa salida eksáktamente 6or. Hopi mucha a kana e 7 KM di SVB pa After School Academy na Kolegio Nechi Pieters na Manhattanweg 6a den Buena Vista ku ayudo di nan tata, mama i otro partisipante ku tin e muchanan su bienestar na kurason.

Child First Foundation ta selebrá su di 10 aniversario dia 9 di novèmber 2019 i ta invitá henter pueblo di Kòrsou, pa partisipá i asina kontribuí na desaroyo di e muchanan di After School Academy den Buena Vista.

E studiantenan di e After School Academy ta risibí un kuminda kayente saludabel tur merdia promé ku nan kuminsa ku lès despues di skol. Despues di kome, e muchanan ta haña lès na un manera holístiko. Child First Foundation ta invertí den edukashon di siudadanonan mundial ku ta Konsiente, Produktivo, Felis, ku tin Propósito i ta biba un bida Signifikante.

Pa mas informashon por bishitá e página di Facebook di Child First Foundation i yama +5999 737 7212. Tambe por manda un e-mail na info@childfirst-foundation.com. T-Shirt pa Kaminata Yu i Tata ta na balor di ANG 15 i ta obtenibel for di 29 di òktober 2019 na 24 uur uit de muur i na Grand Café Mahaai.