E kumbre “Invest in Willemstad” a kaba. Meta di e kumbre aki tabata pa trese dinamismo i mas bida bèk den nos sentro di siudat históriko ku atkisishon di invershon i aktividatnan nobo. A invitá empresarionan lokal i Hulandes pa e kumbre aki. E interes pa partisipá tabata aplastante; alrededor di 100 empresario a inskribí. Na final por a tende únikamente zonidunan positivo riba e organisashon, pero loke ta mas importante ta ku a pone bon kontakto entre empresarionan lokal i Hulandes pa huntu emprendé na Willemstad.

E lider di e delegashon Hulandes, Hans de Boer, presidente di VNO-NCW, a bisa di organisashon di e mishon di invershon pa Willemstad: “E kuminsamentu tabata difísil. Notisianan negativo tokante Kòrsou ta hasi’é difísil pa interesá empresanan pa bai hasi algu na Kòrsou. Pero al fin al kabo a logra bini Kòrsou ku un delegashon di 34 empresario/organisashon”.

Di parti di Kòrsou alrededor di 60 empresa a registrá pa partisipá na e kumbre. Despues ku a organisá enkuentronan eksitoso na Kámara di Komèrsio, e kandidat di registrashon a drenta na bòshi.

Tabatin tres tipo di empresario na e kumbre: e desaroyadó di proyekto i invershonistanan; e empresarionan interesá pa operá propiedat inmóboil den sentro di siudat i e empresarionan ku ta mas bien fasilitadó manera kompanianan di konstrukshon, suministradónan, arkitektonan, e.d.

Ademas tabatin di Kòrsou un grupo supstansial di doño di propiedat inmóbil ku tabata ofresé nan edifisionan pa duna nan un funshon otro òf nobo. Hopi be nan tabata en buska di invershonista òf operador pa huntu nan sigui desaroyá.

E kumbre di invershon di 10-12 di òktober tabatin un programa ekstenso intenshoná pa laga empresarionan tantu lokal komo Hulandes sera konosí ku e potensia di Willemstad: un siudat históriko outéntiko ku un meskla úniko dsi kultura Hulandes i Karibense ku ta pará na bispu di un interes nobo, dinamismo i desaroyo.

Tabatin presentashonnan enkuanto loke a realisá manera Pietermaai di un distrito di “no go” pa un di “go”; loke ta andando: Corendon ku 800 kamber di hotèl i e proyekto Kaya Kaya; loke ta pará kla pa pronto haña un funshon nobo: Kabes di Skalo di funshon di haf pa residensial, e Distrito Sint Elisabeth di hospital pa sentro di kuido, bibienda i ‘horeca’ i e pisonan ariba den Punda di funshon di depósito pa bibienda.

“Ku e presentashonnan aki, segun kordinadó di e kumbre Rob van den Bergh, klaramente ta indiká unda nos ta bai ku Punda, Otrobanda, Pietermaai i Skalo. Tur kuater bario di Willemstad tin un potensia enorme”.

Banda di esei tabatin mas seshonnan informativo. Un seshon a trata pakiko invertí na Kòrsou, pero tambe dikon empresarionan ta invertí na Kòrsou si nan ke haña un bon akseso na merkadonan di Colombia i Panamá. Un otro seshon a enfatisá e posibilidatnan di supsidio den kaso di restorashon di monumento, e insentivonan fiskal atraktivo dirigí riba e siudat riba e lista di patrimonio mundial i kon por finansiá invershonnan lokalmente. “Pa un bon proyekto den stat finansiamentu semper ta posibel” segun Michael de Sola di Banko Maduro. Tambe e maneho, lei i regulashonnan a bini na òrdu, i meskos konstrukshon den sentro di siudat.

Un siudat no ta konsistí solamente di piedra. P’esei e kumbre tabata dirigí tambe riba arte i kultura den Willemstad ku ta figurá riba UNESCO su Lista di Patrimonio Mundial. For di Hulanda a bini museonan, ekspertisio riba kon pa redefiní destino di edifisionan eksistente, funshonarionan di Rijksdienst Cultureel Erfgoed ku a topa aki ku sektor kultural lokal. Pa e grupo aki a prepará, banda di e programa general, un opshon kultural spesial pa por yega na mas koperashon intensivo dentro di Reino riba tereno di “art & culture”.

For di e kumbre a surgi tambe un kantidat di bon sugerensia, entre nan:

• Hasi algu na partinan putrí den siudat. Ke men edifisio den estado dekaí i e partinan bashí.
• Lei ta preskribí ku doñonan mester mantené nan edifisio. Gobièrnu na Kòrsou kasi no ta aktua riba e punto aki. Kuminsá ku un maneho severo pa apliká e leinan aki.
• Desaroyo di Willemstad no ta trata solamente di invershonnan i pone piedra riba otro; ta trata di agregá un (òf mas) funshon na edifisio i monumentonan ku ta kuadra ku e habitantenan, kultura i historia di Willemstad.
• E funshon i aktividatnan nobo na Willemstad lo pone ku e demanda pa personal ku un trayektorio den ‘hospitality’ ta bai krese fuertemente. Mester prepará hóbennan pa esaki i mester rekapasitá otronan.
• Gobièrnu i sektor partikular huntu mester pone man na obra pa desaroyo di Willemstad. Gobièrnu mester tin bon oido tambe pa e empresarionan i e habitantenan di e barionan.

Na final di e kumbre Hans de Boer tabata un hòmber satisfecho: “Tur mi empresarionan Hulandes awor ta pensa muchu mas positivo di Kòrsou i Willemstad fo’i ora nan a baha for di avion”.

E promé reakshonnan di e partisipantenan tabata sumamente favorabel enkuanto e posibilidatnan ku Willemstad ta brinda. Den e añanan binidero e siudat lo desaroyá fuertemente. Awor ta e bon momento pa djòin. Algun empresario a laga sa ku ya nan a pone bon kontakto pa bai hasi algu na Willemstad.

Billy Jonckheer, presidente di Kámara di Komèrsio, tabata orguyoso di e kumbre: “E kumbre aki a mustra ku e sektor partikular den Reino por traha huntu pa drecha nos ekonomianan. Follow-up lo ta sumamente importante. Awor ta ta kestion pa aktua”.