Kòrsou su Karnaval lo ta kargá ku selebrashon durante 2020, 50 aña Karnaval di Kòrsou, 50 aña Festival di Tumba. I pa koroná e aña yená ku selebrashon aki Grupo di Karnaval “Crazy Diamonds” tambe lo selebrá 20 aña di eksistensia!

Atraves di e binti añanan aki e grupo a sòru pa mantené su nòmber atraves di tur tipo di sirkunstansia ku por a presentá. Semper ku e mesun ambiente i goso, briyando den gran marchanan di Karnaval di Kòrsou.

Pa por ilustrá e añanan ku e grupo a sabi di partisipá un tema diferente a wòrdu skohí pa por selebrá den grandi e logro aki kual ta: “ The Magic of Chakras”.

E tema lo ilustrá e balansa i energia ku ta biba den kurpa di un karnavalista ilustrando e wil di koló di chakra. Kada koló di chakra tin nan nifikashon i punto den e kolumna vertrebal di kada karnavalista. 

E 7 kolónan di chakra a wòrdu elaborá p’asina duna e balansa i nifikashon den e trahe. E wil di chakra ilustrando e kolónan Lila, Blou, “Turquoise”, Bèrdé, Hel, Oraño i Fuksia ta visibel den trahe i piesa di kabes(headpiece).
I na mes momento tur kos den bida mester tin e balansa yin i yan, e bon i malu. P’esei e koló pretu i blanku ta forma e base di e trahe.  P’e toke final hopi stenchi i briyo a wòrdu uzá pa ilustrá e lus i magia di diamante den e trahe di Crazy Diamonds 2020.

Enbista ku nos ta den un selebrashon total Crazy Diamonds kier a duna e oporunidat  na personanan ku ta interesá pa partisipá k’un “Early Bird special”. Esaki ta valido si bo paga bo kontribushon promé ku 7 di desèmber 2019, pa solamente f 950,-! 

Despues di e fecha ariba menshoná, e preis nòrmal lo ta f1150,-.
Pa studiante te ku 23 aña ku ta disponé di un komprobante di e aña eskolar 2019/2020 tin e oportunidat pa partisipá pa un preis spesial.
Si bo ta deseá mas informashon bo por app libremente na 693-1313 i asina risibí tur informashon.
Bin gosa di e Magic of Chakras ku Crazy Diamonds den Karnaval 2020.