Lijnden, djabièrnè 13 di sèptèmber 2019 – Ayera durante di un konferensia di prensa na Kòrsou,  fundadó i doño di e hotèl, Atilay Uslu a revelá nòmber di e ‘resort’ sinku strea ‘utra all-inclusive’ ku Corendon Hotels & Resort ta desaroyando riba e isla. Despues ku finalisá e rekonstrukshon kompleto, Corendon Mangrove Beach Resort ku su 850 kamber, lo ta e hotèl di mas grandi den Karibe. Corendon ta realisá den e promé fase un hotèl sinku strea ku 381 kamber i 18 ‘suite’, kuater pisina, nuebe restorant i bar, un parke di awa i tres sala di reunion. E apertura di e promé fase di e ‘resort’ ta planiá pa aprel 2020.

Limpiamentu di Mondi di Palu di Mangel

Kòrsou tin ya mas ku 20 aña kaba riba e Lista di Patrimonio Mundial di Unesco. Parti di esaki ta e awanan rondó di e isla i áreanan na kosta di e isla, riku na Mondinan di Palu di Mangel (‘Mangrovebossen’), yerbanan di laman i refnan di koral. Rònt mundu Mondinan di Palu di Mangel ta den peliger di ekstinshon, sinembargo nan ta di vital importansia pa biodiversidat, purifikashon di awa, fihamentu di karbon i protekshon di kosta. Mirando ku e ‘resort’ ta situá den un área di naturalesa úniko kaminda tin Palu di Mangel, Corendon lo bai limpia tantu e Palunan di Mangel riba su propio tereno, komo tambe e áreanan ku ta serka di esaki. Lo limpia e tereno den konsulta ku organisashonnan di konservashon di naturalesa riba e isla, lo deshasí di serunan di shushi manualmente i lo drecha henter e área.

Pènelnan solar i purifikashon di awa

Huntu ku Aqualectra Kòrsou, Corendon ta kompartí ideanan pa desaroyá solushonnan inovativo pa krea un konsepto hotelero sostenibel. Corendon ta usa pènelnan solar pa Corendon Mangrove Beach Resort, pa asina generá 2.3 megawòt di elektrisidat i di e forma ei e ‘resort’ ta kompletamente outosufisiente. Ademas ta hasi uso di awa di laman pa ducha, labamano, tualèt i pisinanan, aplikando e sistema di ‘reverse osmose’.  Despues ku filtra e awa residual ku ta sali for di esaki, ta usa un kuart pa e hardinnan. E tres kuart restante, e hotèl ta duna gratis na kunukeronan pa di e forma ei kontribuí na un medio ambiente duradero.

Empleo i estudio

Na aña 2018 Corendon a kuminsá ku renobashon i ekspanshon di e kompleho basta bieu di Holiday Beach. Corendon ta realisando den e promé fase un hotèl di sinku strea ku 399 kamber i vários fasilidat. Na promé instante e ‘resort’ lo brinda trabou na alrededor 350 empleado. Ademas Corendon ta funda su propio akademia kaminda ta forma personanan di e isla komo kòki, weter òf personal di ‘front office’ manera resepshonista. Den e di dos fase, lo desaroyá 450 kamber mas. Segun espektativa lo entregá esakinan na fin di 2020. Esaki tambe lo sòru pa kupo di trabou pa 250 abitante di Kòrsou.

Arte i herensia kultural

Corendon Hotels & Resort ta traha huntu ku organisashonnan i artistanan ku ta dediká na herensia kultural i arte di e bario di Ref ku ta keda den Otrobanda, kaminda e ‘resort’ ta situá. Desénas di obranan di arte di artistanan di den e bario, ta haña un espasio na lugánan prominente den e ‘resort’. Di e forma aki huéspetnan ta sera konosí ku arte, kultura i herensia di e isla i asina ta stimulá nan pa eksplorá e bario den forma di un ‘walking tour’. Durante di e rekorido abitantenan i artistanan ta duna informashon tokante historia i kultura di e isla i e bario.

Variedat amplio di ‘horeca’

E ‘ultra all-inclusive resort’ tin nuebe establesimentu di ‘horeca’, ku un variedat sumamente amplio. Den e ‘buffetrestaurant’ ta prepará platonan internashonal ku produktonan di kalidat superior. Banda di esaki tin tambe un restorant ‘á la carte’ kaminda huéspetnan por disfrutá di un eksperensia kulinario hapones. Den The Don Cigar Lounge e huéspetnan por disfrutá di e mihó wiski, sigá, koñak i delisioso kòktel.

Parke di awa i slep Cobra

Banda di e pisinanan, tin tambe un paraiso di slep (‘glijbaan’). E parke di awa di e hotèl ta konsistí di seis slep di kua King Cobra ta esun mas espektakular ku su kabes, kolónan i patronchi di kolebra manera Kobra. Ademas King Cobra ta e úniko slep den su sorto den Karibe.