The Montessori School Foundation ku resientemente a habri nan promé skol Montessori outéntiko na Kòrsou, a sera un areglo di penshun ku ENNIA pa nan personal.

Komienso di The Montessori School na Damacor ta promé fase di un proyekto mas grandi. E proyekto The Montessori Village  ta un plan ku ta kubri un kantidat di aña, kaminda ta ofresé enseñansa sigun e método  Montessori  for di nasementu te ku 18 aña. Banda di esaki ta bini un kompleho di bibienda pa hende grandi, kaminda entre otro hendenan grandi ku demensia por sigui un programa di dia inovativo basá riba e método di Montessori. Na e sitio ta bini espasio tambe pa kompanianan chikitu i lo realisá un sentro pa investigashon i inovashon.

“Ultimo 2 aña nos a dediká nos atenshon kasi eksklusivamente na planifikashon i ehekushon di e Montessori Village. E proyekto akí ta nos meta mas grandi,  i nos a partié den metanan mas chikitu ku ta mas fásil pa supervisá. Nos tabata buskando un partner den seguro ku ta dispuesto pa traha huntu ku nos i asina alkansá e meta mas grandi.”, sigun Danielle Palm, presidente di The Montessori School Foundation i kabes di e skol.

The Montessori School Foundation a sera un pakete kompletu di seguro serka ENNIA ku ta kubri kuido, daño, responsabilidat sivil i penshun kolektivo. “E pakete tin un flèksibilidat di kobertura ku ta kuadra ku nos aktividatnan di kresementu i desaroyo. Pa nos ta importante ku mayornan di e muchanan, studiantenan, partnernan i e personal por sinti nan mes sigur.”

“E koperashon ku ENNIA a kana fásil i lihé.  Eksperto di seguro Shairlon Balentina a hasi e análisis di riesgo ku nos i a base di nos deseonan a traha un pakete ku ta kuadra den  kresementu i filosofia di e organisashon , sin sera seguro di mas òf di ménos. Pa loke ta penshun accountmanager Tini Lasten a splika e materia i kalkulashonnan di un manera hopi  kla.” sigun Palm.

Montessori: Libertat enkuaderná.

The Montessori School ta ofresé un ambiente di edukashon sigur i  stimulativo ku ta yena e nesesidatnan natural di e mucha entre 18 luna i 6 aña.

Enseñansa estilo Montessori ta un método di edukashon kreá ku hopi dedikashon, kaminda un mucha ta desaroyá mas tantu posibel den su mes tèmpo eksplorando su abilidatnan,  ku guia di un dosente di Montessori  eksperensiá i hasiendo uso di material spesialmente diseñá pa uso huntu ku e método Montessori.

Enseñansa estilo Montessori ta basá riba un balanse suave entre libertat i un kuadro di reglanan fiho, resumí komo “libertat enkuaderná ”. Pa mas informashon, bishitá e wèpsait  Montessori.cw.