WILLEMSTAD –JCI Dutch Caribbean a organisá pa di 5 bia un Akademia di Liderasgo. E
aña aki ku e lema “Influential Leadership”.
Meta prinsipal di e evento ta pa engrandese konosementu di miembronan pa asumí
posishonnan di líderasgo den direktiva i proyekto. E akademia a tuma lugá na Acoya
Curaçao, Resort, Villa & Spa.
Durante e wikènt di treinen miembronan di
diferente organisashonnan lokal di JCI Ducth Caribbean a forma parti di e
akademia di liderasgo ku e lema “Influential Leadership”. E akademia aki ta e
nivel di mas haltu den JCI Dutch Caribbean pa forma miembronan riba e tema di
liderasgo. Meta di e akademia ta pa ekipa e miembro atrabes di diferente kursonan.
Entre otro “Influence & Leadership”,
“Financial Management” i “Strategic Communication”. E aña aki tambe e
organisashon a halsa nivel i konosementu di e akademia ku un entrenador
internashonal.
JCI Dutch Caribbean ta krea oportunidat úniko na tur partisipante i ta desaroyá
su miembronan riba e tereno di liderasgo. Di e forma aki garantisá lidernan
integro i aktivo pa futuro den e organisashon i den komunidat pa krea kambio
positivo pa nos pais.
E akshonnan di lídernan di e kaliber aki ta tradusi su mes pa medio di e
organisashonnan lokal ku ta ehekuta proyektonan i trese solushonnan sostenibel
den nos komunidat.
Bou di guía di presidente di JCI Dutch Caribbean Dupal Persaud, e evento a ser
realisá pa Heinrich Angela huntu ku e tim di entrenadónan kapasitá Candice
Henriquez (Head Trainer), Rainelda Maduro i Argenis Angulo (Venezuela).
JCI ta e organisashon mundial di lidernan
entre 18 pa 40 aña ku ta dediká na trese kambio positivo den nos komunidat.
JCI Dutch Caribbean ta konsisti di 6
organisashon lokal. Na Kòrsou tin JCI Creative Leaders in Curaçao (CLIC), JCI
Involvement Of Banda Ariba Curaçao (IOBA), JCI United Citizens Of Curaçao (UC)
i JCI Willemstad. Na Boneiru tin JCI Young United Bonaire (YUB) i na Aruba tin
JCI Young Active Leaders Aruba (YALA).
Si abo komo individuo ke bira miembro pa desaroyá i kontribuí na nos komunidat,
tuma kontakto ku direktiva di JCI Dutch Caribbean na dutchcaribbean@jci.cc.
Pa mas informashon tokante JCI, bishitá www.jci.cc, sigui nos via www.fb.com/jcidutchcaribbean