WILLEMSTAD – Djasabra último Curaçao Marriott Beach Resort huntu ku Impacto a tene un job fair (marshe di empleo) den e edifisio di International School Curaçao (ISC) ku a surpasá e ekspektativanan mas haltu pa loke ta e kantidat di hende ku a mèldu pa un trabou. Na final di dia e konteo di e kantidat di solisitut pa e hotèl a alkansá alrededor di 1500.

Henter dia e tim di Rekurso Humano i Gerensia di Marriott a haña asistensia profeshonal di Impacto pa informá esnan interesá i pa hiba kombersashonnan mas avansá si resultá kon serio nan ta den nan interes pa bai traha na e hotèl. Den e kaso aki tabata bai eksklusivamente pa buska hende lokal; no pa buska hende djafó. Den e dianan binidero lo analisá e resultadonan di e marshe di empleo i lo inisiá un siguiente prosedimentu pa por tuma mas ku 300 empleado nobo na trabou ku tin mester den e fase inisial. Ora e job fair a habri mainta 8 or ya tabatin algun shen interesado basta ratu ta para warda dilanti e portanan di ISC. Den e promé oranan tabatin e pik mas grandi, pero tòg e fluho di interesadonan a sigui te 3 or di mèrdia pa purba haña un trabou den e hotèl ku ta den su fase final di un renovashon drástiko.

Den kurso di mainta e ministernan Kenneth Gijsbertha (finansa i turismo) i Hensley Koeiman (asuntunan sosial i labor) mes a bin tira un bista. A informá nan tokante e prosedimentunan i nan a ekspresá nan konsentimentu pa e forma ku Marriott i Impacto a hinka e evento aki den otro i a ehekutá esaki.