Djaluna anochi promé di yüli na Kura Hulanda Village durante “Changing of the Board” a presentá direktiva nobo di Rotary Club Willemstad  na miembro- i invitadonan. Durante e anochi  prinsipalmente a para ketu na e resultadonan di e aña ku a pasa. Maestro di seremonia Tosca Geneste a karakterisá e aña Rotariano ku a pasa komo unu di entusiasmo i union, ku e guia inspirativo di presidente saliente Benno van Leeuwen.

Banda di e eventonan anual manera Rotarrally, Walking Dinner i Duck Race, huntu ku organisashon ruman Rotary Club Curaçao, Rotary Foundation, diferente spònser i Fundashon Prevenshon, Rotary a hunga un rol importante den realisashon di e aparato di mamografía nobo pa Fundashon Prevenshon.

Benno van Leeuwen a kuminsá su aña 2018 implementando un struktura nobo den e klup. A forma diferente komishon ku kada unu nan mes mishon i huntu un mishon en komun, loke  mésora a hiba na bon resultado. Union a krese  den e klup i asina a logra proyektonan grandi ku a duna hopi satisfakshon. Hopi hende a ripará e éksito di Rotary, i e klup a haña 13 miembro aserka. Komo korona riba e trabou Rotary International a kondekorá Rotary Club Willemstad komo “100% Paul Harris Club”. Esaki ta algu úniko pa Kòrsou.

Riba e anochi akí a pone atenshon spesial na Bos di Hubentut pa nan trabou pa komunidat i tambe pa por disponé di nan Bikers Team durante eventonan di Rotary. A entregá Bos di Hubentut e donashonnan semanal di e miembronan durante reunionnan di Rotary  den dos sparpòt  yen yen.

Despues ku a sera e aña di Rotary, a pasa e martin simbólikamente pa e presidente nobo Jeanette Hooi-Bonet. Pa e próksimo aña é huntu ku su tim lo dirigí Rotary Club Willemstad.

Jeanette ta miembro di Rotary for di 2012 i  ku su eksperiensha e ta bai duna un kontribushon balioso na e tema nobo di Rotary “ Rotary connects the World”.