Entrenadornan lokal tambe a risibí klínika di Real Madrid djasabra último

WILLEMSTAD: “Banco di Caribe ta konsiderá e klínika un oportunidat úniko pa e hóben lokal. Nos patrosinio na e Fundashon di Real Madrid ta prueba di un kontribushon kontinuo na desaroyo di nos muchanan i hóbennan di Kòrsou”, esaki di akuerdo ku sr. Dito de Kort. Algun siman pasá Banco di Caribe a anunsiá su patrosinio na e klínika pa Kòrsou i Boneiru. Primeramente lo start aki na Kòrsou den e periodo di 5 pa 9 ougùstùs benidero, i despues na Boneiru di 12 pa 16 di ougùstùs. Djasabra último entrenadornan di Real Madrid tabata na Kòrsou, pa train i selekshoná e trainernan lokal ku lo bai duna e klínika. Tantu sr. Dito de Kort i sr. Percy Virginia tabata presente na vèlt di Vesta pa animá e muchanan.

“Ta pruebá ku deporte engeneral ta desaroyá e mucha den un adulto ku lo ta di gran balor i kontribushon na su komunidat. Un di e motibunan pa kual Banco di Caribe ta sostené tipo di proyektonan manera esun di Fundashon Real Madrid òf e resien Carifta Junior Chess Championships. Banco di Caribe ta pone su konfiansa den tur mucha ku lo ta partisipando na e klínika, i ta spera ku nan keda inspirá pa bira lidernan den futuro”, asina sr. de Kort a sigui komentá.

Tokante e klínika di Fundashon Real Madrid

Na Kòrsou 125 mucha lo partisipá i na Boneiru 80; e muchanan di entre 6 i 17 aña di edat lo partisipá den dos diferente kategoria. E klínika aki na Kòrsou ta wòrdu organisá pa e organisashon di futbòl lokal Vesta di Sta. Maria, konhuntamente ku Real Madrid. Na Boneiru, lo ta Real Rincon. Na final di e klínika dos mucha/hóben, huntu ku nan entrenador lo biaha pa Madrid, Spaña i einan partisipá na un klínika di e tim di Real Madrid. Partisipando na e klínika e hóbennan lo risibí nan unifòrm, tur artíkulo di e ekipo spañó i algun dia di téknika i táktika intensivo. Den transkurso di añanan Fundashon Real Madrid a organisá alrededor di 474 klínika di futbòl den 45 pais. Mas di 47,853 hóben a benefisiá di e programa.